Дьокуускайга Уһук Илиҥҥи федеральнай уокуруктааҕы кикбоксиҥҥа чемпионат ыытылынна

Уһук Илин 100 тахса бастыҥ кикбоксера Арассыыйа чемпионатыгар кыттар иһин киирсэр. Манна саастарынан хас да категорияҕа спортсменнар кытталлар. Биир саамай чаҕылхай киирсиилэри эдэр оҕолор көрдөрөллөр.

Юниордарга 71 киилэҕэ Хатас кикбоксинын оскуолатын иитиллээччитэ Николай Слепцов финалга Сахалин уобалаһын спортсменын эрэллээхтик кыайда. Кини бу спорт көрүҥүнэн дьарыктаммыта номнуо 4-с сылыгар барда. Бастаан боксаттан саҕалаабыт, билигин охсуулаах-тэбилээх көрүҥнэргэ бэйэтин холонор. 

Николай Слепцов, А.Иванов аатынан кикбоксиҥҥа Уһук Илиҥҥи федеральнай уокурук чемпионатын юниордарга 71 киилэҕэ кыайыылааҕа: «Барытыгар кыттабын. 2024 сылга бастаабытым, 2023 сылга иккистээбитим. Дьарыктан барыта кэлэр. Элбэх дьарык түмүгэ».

Өссө биир Хатас эдэр кикбоксера Алексей Алексеев бэйэтин ыйааһыныгар эмиэ тэҥнээҕин булбата. Финалга биир дойдулааҕын кытта киирсэн суудьуйалар биир кэлим быһаарыыларынан кыайыылаах буолан таҕыста. Кини бу Уһук Илиҥҥи уокурук чемпионатыгар эмиэ хаһыс да кыттыыта буолар.

Алексей Алексеев, А.Иванов аатынан кикбоксиҥҥа Уһук Илиҥҥи федеральнай уокурук чемпионатын юниордарга 67 киилэҕэ кыайыылааҕа: «Үһүс кыттыым. Ыарахан соҕус этэ. Спорт маастара буолбут киһи».

Уопсайынан бу чемпионатка Хатас кикбоксердара бэккэ кииристилэр. Манна даҕатан эттэххэ, дьарыктара уонна бэлэмнэрэ күүстээх. Тренер Гаврил Саввин оҕолорун арыаллыы сылдьар. Кини билигин элбэх оҕо кикбоксиҥынан дьарыктанар диэн бэлиэтиир. Маныаха төһүү күүс Хатасска саҥа спорт саалата үлэҕэ киирбитэ буолар.

Гаврил Саввин, Хатасстааҕы спорт оскуола боксаҕа уонна кикбоксиҥҥа тренерэ: «Уһук Илиҥҥэ алта оҕону туруорбутум. Икки уол бастаата, икки – иккис миэстэ уонна икки оҕо үһүс миэстэ буоллулар. Бу күрэх тэриллиитэ үчүгэй. Арассыыйаҕа күрэҕэр бараары киирсэбит».

Чемпионатка уопсайа 6 регионтан спортсменнар кыттыыны ылаллар. Саха сирин, Приморье, Бурятия, Камчатка, Сахалин уонна Амур уобаластар суумэрдэммит хамаандалара. Барыта 110-тан тахса кыттааччы. Ыраах тайаан сытар Камчатка быйыл күүстээх састаабы аҕалбыт.

Темир Эргешов, Камчатка сүүмэрдэммит хамаандатын тренерэ: «Состав сборной Камчатского края привезли 11 спортсменов. Почти все вышли в финал и удостоились победами».

Чемпионат уопсайа 12 ыйааһыҥҥа 3 саастарынан категорияҕа ыытылынна. Курэхтэһии тумугунэн призердар Арассыйа чемпионатыгар кыттар быраабы ыллылар.