Сааскы халааҥҥа бэлэмнэнии үлэтэ саҕаланна

Сааскы халааны этэҥҥэ аһардарга үлэ саҕаланна. Билигин оперативнай бөлөхтөр тэриллэннэр, күннэтэ мунньахтар ыытыллаллар. Маныаха халаан иннинээҕи кэтиир-маныыр үлэлэр, ол эбэтэр ханна куттал тахсыан сөптөөх сирдэрэ чинчийиллэллэр. Маныаха улахан болҕомто уу саппааһын харайар сирдэргэ ууруллуоҕа.

Варвара Максимова, Өлүөнэ өрүс тардыытын ууга салалтатын ууга хаһаайыстыбатын салаатын салайааччыта: "Бүлүү ууну мунньар сиригэр нуорма быһыытынан уу кэлэрэ сабаҕаланар. Күн бүгүн Халыма ууну мунньар сирэ кутталлаах туруктаах. Онно нуорманы таһынан уу кэлиэхтээх. Кулун тутарга улахан мунньах буолуоҕа. Онно ууну ыытыыны быһаарсыахпыт".

Өлүөнэ өрүс тардыытын ууга салалтата иһитиннэрэринэн быйыл өрүстэрбитигэр муус халыҥа араастаһар. Холобур, Өлүөнэ эбэҕэ араас сирдэринэн муус нуормаҕа тиийэр уонна тиийбэт.

Пётр Аргунов, Өлүөнэ өрүс тардыытын ууга салалтатын салайааччы: "Өлүөнэҕэ муус Дьокуускайтан Покровскайга диэри нуорматтан кыра. Аны Покровкай аттынан орто кээмэйи таһынан. 20 сантымыатырга тиийэ халыҥ сирдэр баар буолуохтарын сөп. Хоту диэкки муус нуорматтан халыҥ. Холобур, Эдьигээҥҥэ".

Манна даҕатан эттэххэ, Амма өрүскэ быйыл муус 8 сантымыатырынан халыҥ, салгыы Бүлүү өрүскэ муус халыҥа нуорматыгар тиийбэт. Хоту өрүстэргэ төптөрүтүн муус халыҥ, сорох сирдэргэ букатын 15-18 сантымыатырынан халыҥаан турар. Маны барытын этэҥҥэ аһардар соруктан билигин номнуо оперативнай мунньахтар, үөрэтиилэр ыытыллаллар.

Туйаара Мордосова, СӨ гражданскай көмүскэлин уонна нэһилиэнньэ олоҕор-дьаһаҕар куттал суох буолуутун хааччыйыы министиэристибэ пресс-сэкирэтээрэ: "Халаан уутун этэҥҥэ аһардыыга биһиги министиэристибэбит үлэтин саҕалаата. Ол курдук 100 тахса киһилээх 8 оперативнай бөлөх тэриллиэ. Ити бөлөхтөр харыы тахсыбыт сирдэригэр сэрэтэр уонна эстэрэр үлэлэри ыытыахтара. Бу сылга 20 туонна дэлби тэптэрэр тэриллэр миэстэтигэр тириэрдиллиэ". 

Быйыл ууга барыан сөптөөх нэһилиэнньэлээх пуннарга 242 дьон быстах кэмҥэ куоттаран олорор сирдэрэ тэриллиэҕэ.