Новгород уобалаһыгар охтубут саха буойуттарын кэриэстиир тэрээһиннэр

Быйыл Улуу Кыайыы үбүлүөйдээх 80 сылын көрсө, итиэннэ Ильмень күөл кыргыһыытын 82 сылыгар анаан Саха сирин делегацията үгэс быһыытынан Новгород уобалаһыгар ыалдьыттаата. Уус Алдан улууһун Бэйдиҥэ нэһилиэгин "Дэгэйиик" үҥкүү ансаамбылын далбар хотуттара Саха сирин буорун аҕалан, сыт таһааран, бу сиргэ охтубут саха буойуттарын кэриэстээтилэр. 

Лариса Васильева, "Дэгэйиик" үҥкүү ансаамбылын салайааччы: "Олохторун толук уурбут буойуттарга сүгүрүйэ, махтана кэлэн турабыт". 

Биир дойдулаахтарбыт бу Устьрек дэриэбинэҕэ баар бырааттыы көмүллүбүттэр уҥуохтарыгар саха буойуттарыгар анаммыт өйдөбүнньүккэ биир бастакынан сырыттылар. Манна олохтоох былаас уорганнарын бэрэстэбиитэллэрэ, бэтэрээннэр, көрдүүр устудьуоннар этэрээттэрэ, олохтоохтор кыттыылаах миитин буолла. Бу манна баар пааматынньыгы 25 сыл анараа өттүгэр саха норуодунай суруйааччыта Егор Неймохов көҕүлээһининэн туруорбуттара.

Мария Неймохова, СӨ норуот суруйааччыта Егор Неймохов кэргэнэ: "Ильмень күөлүгэр сэриилэспит буойуттар тустарынан кинигэ суруйбуттара хас да буолан. Маны сэргэ Кыайыы 60 сылыгар “Ильмень үрдүнэн туруйалар” диэн уус-уран киинэни таһаарбыта".  

Салгыы "Старай Руссаны босхолоспут саха буойуттарыгар"  өйдөбүнньүк бэлиэҕэ венок уурдулар. Ону таһынан Ретле диэн дэриэбинэҕэ Ильмень күөл кытылыгар Ньурба улууһун уопсастыбынньыктара 5 сыллааҕыта туруорбут сэргэлэригэр, хотугулуу-арҕааҥҥы фронт музейыгар сырыттылар.

Степан Лебедев, экономика үрдүкү осколатын Санкт-Петербурдааҕы филиалын устудьуона: "Экскурсоводтар олус үчүгэйдик барытын кэпсээтилэр. Аҕа дойду сэриитин историятын итиэннэ манна Старай руссаҕа буолбут кыргыһыылары сырдаттылар".  

Ил Дархан көҕүлээһининэн саҕаламмыт "Бастионы памяти" өрөспүүбүлүкэтээҕи бырайыак чэрчитинэн быйылгыттан Смоленскай, Псковскай, Калужскай уонна Новгородскай уобаластарга Аҕа дойду сэрииитигэр охтубут саха буойуттарыгар анаммыт пааматынньыктары туруоруохтара. Ол курдук Новгород уобалаһын Буреги диэн дэриэбинэҕэ өссө 1968 сыллаахха турбут пааматынньыкка саха буойуттарын ааттарын кыһыл көмүс буукубанан тиһиэхтэрэ.

Евгений Петров, РФ президенын иһинэн СӨ бастайааннай бэрэстэбиитэлин солбуйааччы: "Бу бырайыак норуот бырайыага. Манна тэрилтэлэр, түмсүүлэр уонна олохтоохтор кыттыыны ылыахтара. Бу тэрээһин Аҕа дойду Улуу сэриитигэр охтубут биир дойдулаахтарбыт ааттарын үйэтитиини көҕүлүө". 

Аҕа дойду сэриитин сылларыгар 1943 сыллаахха  Ильмень күөлү туорааһын иһин кырыктаах кыргыһыыга кыттыбыт 12-с гвардейскай стрелковай куорпус 3,19-с уонна 40-с хайыһар туспа биригээдэлэрин састаабыгар сэриилэспит саха буойуннарын хорсун быһыыларын туһунан өрүү өйдүүбүт.  Ильмень күөл үрдүгэр саха хомуһа тыаһаата, саха ырыата ылланна.