Хоту улуустарга сааскы хараал саҕаланна

Үөрүйэх табаһыттар хас эмэ сүүһүнэн табаны күөрүөҕэ холкутук киллэрэллэр. Маныаха анаан кинилэр мэччирэҥҥэ сылдьар кыыллары күөйэн, араартаан аҕалтыыллар. Маннык уустук дьыаланы хоту хоһуун дьоно эрэ кыайа тутар. Хараал кэмэ саҕаланна эрэ ыстаадаҕа күө-дьаа буола түһэр.  Кыараҕас сиргэ хаайтарбыт кыыллар, көмүскэнэн төргүрүччү эргийбитинэн бараллар. 

Юрий Петров, “Булуҥ” МУП табаһыта: «Сууммабытын Тирэхтээхтэн  аҕаллыбыт, үчүгэйдик киирдилэр. Көрөргүт курдук, ол араара тураллар. Анараа киллэртии киллэртии ааҕан иһэбит».

Хараал кэмигэр хас биирдии төбөнү көрүҥүнэн арааран ахсаанныыллар. Түргэн-тарҕан туттууну эрэйэр үлэҕэ эдэр дьону сыһыараллар. Аны бу туран табаһыттар хас биир кыыл туругун кэтээн көрөллөр. 

Алексей Марков, “Булуҥ” МУП табаһыта: “Табабыт наһаа уойбата. Муус устартан көһүөхпүт. Төрүөхпүтүгэр тыһыларбытын араартыахпыт”.

"Булуҥ" хаһаайыстыба 3.5 тыһыынча төбөлөөх. Былырыын икки улуустан таба атыылаһан төрдүс ыстааданы тэрийбиттэр.

Руслан лукин, “Булуҥ” МУП дириэктэрэ: “Усуйаанаттан 700-чэкэ табаны ылбыппыт уонна Эбээн Бытантай Саккырыырыттан эмиэ 700 курдугу атыыласпыппыт. Онон Булуҥ улууһугар хаан уларыйыыта барда”.

Онон табаһыттарга быйыл ураты кыстык ааһан эрэр. Үс араас сиргэ иитиллибит кыыллары бииргэ тутан көрүү.

Василий Корякин, “Булуҥ” МУП табаһыта: “Былырыын, иллэрээ сыл үс араас сиртэн табаны холбоон, олору тута сылдьабыт.  Холботолоон биир суумма оҥордубут”.

Быйыл кыһын  табаҕа олус куһаҕана суох дьыл буолбутун бэлиэтииллэр. Ол эрэн адьырҕа кыыл ахсаана элбээн табаны тардыыта син биир сытыы кыһалҕа.

Николай Стручков, “Булуҥ” МУП табаһыта: “Ыстаадабыт үчүгэйдик кыстыаҕын кутуруктаахтарбыт мэһэйдииллэр. Түөрт бөрөлөөхпүт, онтуларбыт кэлэн аймаан бараллар. Ааспыкка ол бөрөлөрбүтүн эккирэтэммит син куоттардыбыт”.

"Булуҥ" тэрилтэ уопсайа 4 ыстааданан 30 үлэһиттээх. Манна үлэлииргэ сөптөөх усулуобуйа тэриллэн, табаһыттар өрө көтөҕүллэн туран төрүт дьарыгы харыстыыллар, сайыннараллар. 

Афанасий Стручков, “Булуҥ” МУП табаһыта: “Хараалларбыт, дьиэбит, баанньыкпыт, гаражпыт барыта баар. Чуум үлэһиттээхпит. Онон үлэ кэннэ сылаас дьиэҕэ-уокка, аска кэлэбит”.

Эдэр табаһыттар маамыктанан бастыҥ буурдары, ол эбэтэр көлүүр табалары тутаттыыллар. Уопсайа 18 төбөнү талыахтара. Бу кыыллар кулун тутарга табаһыт сүлүөтүгэр кытталлар.

Семен Корякин, “Булуҥ” МУП 3-с ыстаадатын биригэдьиирэ: “Табаларбытын Тиксиигэ диэри илдьэттиэхпитин наада. Мантан Тиксиигэ диэри 300 килэмиэтир. Онон 30 көһү айаннаан тиийиэхтэрин наада. Онтон Тиксииттэн сөмөлүөтүнэн көтүөхтээхпит”.

Мантан саас муус устартан төрүөх саҕаланыа. оччоҕо табаһыттарга эмиэ хас да бүк эппиэтинэстээх кэм саҕаланыа.