Саха сирэ бүтүн дойдутааҕы хор бэстибээлигэр кыттыста

Нам улууһун хорун түмсүүтүн өр сылларга салайан кэлбит Елена Кутукова ырыаһыттарын бэлэмниир. Хас биирдии куолас бары орун оннуларын булан биир кэлим ырыа буолан ньиригийиэхтээх. Аны аҕыйах мүнүүтэнэн коллектив өрөспүүбүлүкэтээҕи хор күрэҕэр ыллыы тахсыа. "Россия - мин историям" музейга бу маннык араас улуустартан барыта 13 ансаамбыл кэлэн кытынна.

Елена Кутукова, Намнааҕы хор коллективын салайааччы: "Сүүрбэттэн тахса киһилээх коллектив 3 ырыаны ыллаатыбыт. Ырыаларбыт патриоттуу ис хоһоонноохтор. Онон өрө көтөҕүлүүлээхтик доргуччу толоруохтаахпыт. Сорукпутун ситистибит дии саныыбын".

Күрэххэ аҕа көлүөнэ хор ансаамбыллара көхтөөхтүк кытыннылар. Олортон биирдэстэринэн Дьокуускайдааҕы "Көмүлүөк" түмсүү кыттыылаахтара буолаллар.Түмсүү быйыл тэриллибитэ 25 сыла. Манна саамай аҕа саастаах кыттааччынан  өрөспүүбүлүкэ бочуоттаах бэтэрээнэ 85 саастаах Елизавета Захарова буолар. Елизавета Егоровна тэрээһиннэргэ өрүү биир бастакынан холонорун кэпсиир.

Елизавета Захарова, Дьокуускайдааҕы "Көмүлүөк" түмсүү кыттыылааҕа: "Төһө да сааһырдарбыт туох эмэ сырдыгы, кэрэни оҥордорбут итиэннэ Кыайыы үбүлүөйдээх күнүн этэҥҥэ көрүстэрбит диэн кэлэн турабыт". 

Аҕам саастаахтары тэҥэ тэрээһиҥҥэ устудьуоннар хордара эмиэ кытынна. Ол курдук Дьокуускайдааҕы педколледж хора эмиэ өрө көтөҕүүлээх айымньылары толорон ытыс тыаһынан доҕуһуолланна.

Борис Кобельянов, Дьокуускайдааҕы педколледж устудьуона: "Уһуйааччыбыт биһигини араас күрэхтэргэ илдьэ сылдьар. Оттон биһиги онно барытыгар кыттан сөбүлэнэн кыттан иһэбит".

Саха сиригэр хор хамсааһыныгар быйыл бэлиэ сыл. Ол курдук сахаттан бастакы хормейстер Феврония Баишева төрөөбүтэ 100 сыла уонна аатырбыт Найахытааҕы норуот хорун төрүттээччи Семен Васильев 95 сылын бэлиэтииллэр. Куонкурска ансаамбыллар араас хайысхалаах нууччалыы-сахалыы 3-4 ырыаны толороллор, олортон биирдэстэрэ байыаннай ис хоһоонноох анаммыт айымньы буолуохтаах. 

Лидия Харитонова, Хаҥалас улууһун норуот айымньытын киинин салайааччы: "Покровскай, Өктөм, Булгунньахтаах хора буолан түмсэммит ыллыы кэллибит. Биһиги олохтоох хоһоонньуттарбыт, мелодистарбыт ырыаларын ыллыыбыт".

Куонкурус бэлиэ түгэнинэн "Тримуф" спортивнай киин уораҕайыгар "Күүс -түмсүүгэ" диэн улахан гала-кэнсиэр буолла. Манна ыҥырыылаах ыалдьыттар уонна ким баҕалаах кэлэн күрэххэ кыттыбыт хор бастыҥ коллективтарын итиэннэ Опера уонна балет тыйаатырын, национальнай үнүстүрүмүөн оркестырын толоруутугар ырыалары иһиттилэр.