Саа көҥүлүгэр уларыйыылар

Талах курдаах Таатта уола Николай Слепцовка бүгүн үөрүүлээх түгэн. Күн бүгүҥҥүттэн кини улахан сааһыт аатын сүктэ, онно туоһу докумуонун илитигэр тутта.

Николай Слепцов, булчут: "Бүгүн миэхэ үөрүүлээх күн. Бастакыбын улахан бултка барсар сааҕа көҥүл ыллым. Бэйэбэр улахан эппиэтинэс сүктүм. Госуслуги порталга иһитиннэрии кэлбитэ ый иннинэ. Ону сүүрэн-көтөн ыйыллыбыт кэмҥэ ситистим. Булчуттарга этиэм этэ, барыта сатанар эбит, докумуоннаргытыгар үчүгэйдик сыһыаннаһыҥ".

Чахчы үчүгэйдик сыһыаннаһар кэмнэр үүннүллэр. Ол курдук, саа-саадах сокуонугар үгүс элбэх уларыйыылары кытары, кытаатылар киирдилэр. Холобур, медисинскэй хамыыһыйаҥ болдьоҕо ааһан бириэмэтигэр докумуоннаспатаххына,саата да суох хаалар түгэннэр баар буоллулар.

Роберт Романов, Росгвардия Саха сиринээҕи салалтатын лицензияны, көҥүлү биэрэр киин саа эргиирин хонтуроллуур салаа судаарыстыбыннай иниспиэктэрэ, полиция лейтенана: "Ол болдьох бүтэр түгэнигэр көҥүлү быһар уонна сааны былдьыыр  бырааптаммыппыт. Ол иһин болдьохторун кэтэнэ сылдьыахтарын наада. Тохсунньу 1 күнүттэн лицензияны ылыы сыаната 5 тыһ. диэри үрдээбитэ. Оттон көҥүлү ылыы уонна уһатыы 1 тыһ. буолла".

Маныаха үгүс уларыйыылар сааны ылааһыҥҥа киирдилэр. Ол курдук, аһыы утах иһэн баран уруулга олорор түгэҥҥэ, итирик туруктаах уопсастыбаннай сиргэ сокуон үлэһиттэригэр утарылаһыы онтон да араас быһылааннарга саа былдьанар буолбута.

Сергей Никитин, Росгвардия Саха сиринээҕи салалтатын лицензияны, көҥүлү биэрэр киин саа эргиирин хонтуроллуур Дьокуускай куорат уонна Жатай уокуруктарын салаатын салайааччытын солбуйааччы, полиция майора: "Федеральнай сокуон ирдэбилинэн былдьаммыт саалары байыаннай тэрилтэлэргэ биэрэр бырааптанныбыт. Ону тэҥэ сааны харчыга тутуу диэн баар".

Маны кытары тэҥҥэ оперативнай-рейдэбэй тэрээһиннэр ыытылаллар. Сааҕа-саадахха күүстээх бэрэбиэркэ барар. Саҥа үүммүт сылга номнуо 100-тан тахса саа былдьанна.

 "Дьокуускай куорат уокуругун үрдүнэн уопсайа 18 тыһ. тахса саалаах. Ол эбэтэр 43 тыһ. саа-саадах баар биллэр. Онтон быйыл сыл саҕаланыаҕыттан уопсайа 371 киһи саҥа саа көҥүлүн ыллылар".

Саҥа булт кэмин баттаһа сотору кэминэн бу хайысхаҕа  бэрэбиэркэлиир-тургутар үлэлэр ыытыллан саҕаланыахтара.