Бу өрөбүллэргэ Триумф уораҕайа Уһук Илин бастыҥ кикбоксердарын түмүөҕэ

Саха сирин биир бастыҥ кикбоксера, Россия 5 төгүллээх чемпиона Вадим Колтовской бары кыттааччылартан саамай уопуттаах. Номнуо 18 сыл бу спорт көрүҥүнэн дьарыктанар. Төһө да үрдүк ааттаах-суоллаах спортсмен, бөдөҥ күрэхтэһиилэр кыайыылаахтара буоллар кини хас биирдии киирсиитигэр туох баар санаатын, күүһүн-уоҕун түмэн кыттар. 

Вадим Колтовской, кикбоксиҥҥа Россия 5 төгүллээх кыайыылааҕа, Аан дойду кубогын 3 төгүллээх кыайыылааҕа, норуоттар икки ардыларынааҕы кылаастаах спорт маастара: "Кыра долгуйуу син биир баар. Ханнык баҕар күрэхтэһиигэ эппиэтинэстээхтик сыһыаннаһан бэлэмнэниэххэ наада. Утарсааччылар эдэр уолаттар бааллар. Олор быдан сэрэхтээх буолаллар. Саха сирэ Уһук Илиҥҥэ бастыҥ. Ол чахчы. Тоҕо диэтэр Россия күрэхтэһиилэригэр наар Саха сирин уолаттара бастыыллар".

Кырдьык да, Саха сирин кикбоксердара бүтүн Россия үрдүнэн бастыҥнар истэригэр киирсэллэр. Ону аҥаардас хас да төгүллээх чемпионнарбыт дакаастыыллар. Михаил Иванов биир ордук элбэх утарсааччылардаах, чаҕылхай киирсиилэрдээх ыйааһыҥҥа үһүс төгүлүн дойдубутугар бастыҥ кикбоксер. Маны тэҥэ Россия сүүмэрдиир хамаандатын хапытаана. Киниэхэ бу Уһук Илиҥҥи федеральнай уокурук чемпионата бөдөҥ күрэхтэһиилэргэ тахсарыгар бастакы үктэл буолбут.

Михаил Иванов, кикбоксиҥҥа Россия 3 төгүллээх кыайыылааҕа, Аан дойду кубогын кыайыылааҕа, Россия спордун маастара: "Уһук Илин чемпионата биһиэхэ буолар олус үчүгэй. Тоҕо диэтэр Уһук Илин күрэҕиттэн анньынан Россияҕа тахсаллар. Онон оҕолорго, саҥа дьарыктанар уолаттарга олох үчүгэй үктэл буолар. Уопут ылыы, санаа бөҕөргөөһүнэ Уһук Илин чемпионатыгар кэлэр".

Уһук Илиҥҥи федеральнай уокурук чемпионатыгар бастаабыт уонна иккис миэстэ буолбут спортсменнар Россия чемпионатыгар кыттар быраабы ылаллар. Онон кикбоксиҥҥа дойду  улахан түһүлгэтигэр тахсарга эдэр спортсменнар бу чемпионакка бары күүстэрин-уохтарын уураллара ирдэнэр.

Дьулусхан Колесов, кикбоксиҥҥа А.Иванов кэриэһигэр ыытыллар  Уһук Илиҥҥи федеральнай уокурук чемпионатын кыттыылааҕа: "Ханнык баҕар киһи кыайыан баҕарар буоллаҕына долгуйуохтаах. Ол эрэн ол киирсиигэ мэһэйдиэ суохтаах. Оннук бэйэбин сааһылыы сылдьабын. Киирсии туһунан санаабаппын".

Быйылгы чемпионакка Саха сириттэн бары ыйааһыҥҥа 100 кэриҥэ спортсмен кыттыаҕа. Билигин түмүктүүр дьарыктар ыытыллаллар.

Андрей Алексеев, кикбоксиҥҥа Саха сирин сүүмэрдэммит хамаандатын сүрүн тренерэ: "Төһө кыалларынан элбэх оҕону, спорсмены кытыннарабыт. “Дьиэбитигэр” буолара онон үчүчгэй. Уолаттарбыт атын регион спортсменнарын кытта киирсэн  уопут ылаллар".

Кикбоксиҥҥа Уһук Илиҥҥи федеральнай уокурук чемпионата олунньу 27 күнүттэн кулун тутар 2 күнүгэр диэри "Триумф" спорт комплексыгар буолуоҕа. Саха спортсменнарыттан чаҕылхай киирсиилэри уонна биллэн турар эрэллээх кыайыыны күүтэбит.