Ильмень күөлгэ охтубут буойуттары кириэстээтилэр

Халлааҥҥа аптамаат доруоба тыаһаан, Ильмень күөл кыргыһыытыгар охтубут буойуттарбытын кэриэстиир тэрээһин саҕаланар. Бу күн анал байыаннай дьайыыга бэйэтин үчүгэйдик көрдөрбүт байыас Айаал Петров, хорсун быһыытын  иһин мэтээли Россия Дьоруойа Игорь Юргин илиититтэн тутта.

Айаал Петров "Коба", анал байыаннай дьайыы байыаһа: "Улахан бааһырыы ыламмыт кэлбитим. Судаарыстыбаннай наҕараадам бу саҥа кэллэ. Анал байыаннай дьайыыга сылдьар уолаттарга дьиэҕитигэр этэҥҥэ төннөн кэлэргитин баҕарабын".

Бу сквергэ олунньу ыйга  өйдөбүнньүк тэрээһин үгэскэ кубулуйан сыллата ыытыллар. Аҕа дойду Улуу сэриитигэр Ильмень күөлгэ олохторун толук уурбут саха саллааттарын кэриэстии элбэх дьон муһунна.  Тэрээһин бочуоттаах ыалдьыттарынан, анал байыаннай дьайыы кыттыылаахтара, тыыл, бойобуой дьайыылар бэтэрээннэрэ, сэрии оҕолоро, эдэр көлүөнэ  уонна ытык кырдьаҕастар буоллулар.

Мария Львова, Сайсары уокуругун бочуоттаах олохтооҕо: "Бу тэрээһини сыллата оҥорор дьоҥҥо истиҥ махталбын биллэрэбин".

Ильмень күөл иэдээннээх кыргыһыыта Аҕа дойду Улуу сэриитин историятыгар киирбит улахан киирсии буолар. Манна үгүс саха ыччата сулууспалаабыт 19-с хайыһар биригээдэтэ суорума суолламмыта, олохторун сыанатынан кыайыыны уһансыбыттара. Быйыл Улуу Кыайыыбыт 80 сылын чэрчитинэн  бу мемориалга көдьүүстээх үлэ ыытыллара былааннанар.

Алексей Еремеев, Ил Түмэн бэрэссэдээтэлэ: "бу мемориалы уопсастыбаннас оҥорбута. Николай Атласов уонна Анатолий Кириллин салалталаах. Кинилэр бу дьыаланы ылсаннар, бырабыыталыстыбаҕа тахсаннар, ону биһиги өйөөммүт оҥоһуллубута. Оттон быйыл Кыайыы 80 сылын көрсө олох үчүчгэй чөлүгэр түһэрии үлэтэ ыытыллыа".

Билигин Арассыыйаҕа Аҕа дойдуну көмүскээччи сылын чэрчитинэн да, анал байыаннай дьайыы буола турар кэмигэр маннык тэрээһин олус суолталаах. Ким да умнуллубат, туох да умнуллубат.