"Чысхаан" хайыһар кулууба биир интэриэстээхтэри түмэр

71-с хаарыгар үктэммит Василий Аммосов төрдүс сылын «Чысхаан» кулуупка киирэн үөлээннээхтэрин кытта көй салгыҥҥа хайыһардаан дайар. Оттон Василий Васильевичка уонна бу хайыһарга турбут кулууп кыттыылаахтарыгар киһи 70 элбэх сааһы биэрбэт. Бары чэпчэкитик хамсанан, аттыгынан сырылаан ааһаллар.

Василий Васильевич бу кулуупка биир саамай эдэрдэрэбин диэн күлэ кэпсиир. Манна оннооҕор 80 лаппа ааспыт аҕам саастаахтар бааллар эбит. Билигин кинилэр Россия чемпионатыгар кытта барбыттар. Уопсайынан бу «Чысхаан» түмсүүгэ үгүс киһи биир интэриэстээх дьонун булан иллэҥ кэмин туһалаахтык атаарар.

Василий Аммосов, Дьокуускай куорат олохтооҕо: «Маннык көй салгыҥҥа кэллэктииби кытта сылдьан доруобуйабытын көрүнэр курдук сананабыт. Манна сылдьар убайдарбытын курдук өр сылларга атахпыт үрдүгэр сүүрэ-көтө сылдьыахпытын баҕарабыт. Атаҕым тоҥмотун диэн кэргэммэр бачыыҥка таһынан кэтиллэр наскы тиктэрбитим. Мантым олус туһалыыр».

Кырдьык да, таҥас-сап өттүгэр хайыһардьыттар ураты болҕомтону уураллар. Билигин син биир кыһыҥҥы температура, уонна эбиитин тыаллаах. Онон таҥас ичигэс ол эрэн чэпчэки ыйааһыннаах буолуохтаах.

Иннокентий Бочкарёв, Дьокуускай куорат олохтооҕо: «Көрдөххө таҥаспыт чараас курдук эрээри, билигин сылааһы тутар таҥастар элбэннэр оннугу кэтэбит. Хайыһар тыынар уорганнарга туһалаах, онон хаһан да ыалдьыбаккын, сөтөл диэни билбэккин».

«Чысхаан» кулуупка 80 тахса киһи дьарыктанар. Сааһыттан тутулуга суох, ким баҕалаах кэлэн хайыһарга туруон сөп. Маныаха сатаабат дьону үөрэтэр тренердэр бааллар. Билигин үксэ аҕам саастаахтар, спорт бэтэрээннэрэ сылдьаллар. Кинилэр истэригэр ааттаах-суоллаах спортсменнар, өрөспүүбүлүкэ, Россия чемпионаттарын кыайыылаахтара бааллар.

Валентина Саввина, хайыһарга Россия кубогын 3 төгүллээх кыайыылааҕа: «Кулууппутугар хайыһар оҥорор тэрилбит суох. Ону онтон мантан эттэһэммит, Екатерина Никитина туруорсан бу хайыһар суолун оҥотторор. Ону массыыналаахтар кэлэн алдьаталлар. Ону биһиги сырыы аайы оҥотторор кыахпыт суох».

Оттон «Чысхаан» кулууп спортсменнарын таһынан Сайсары күөлгэ өрөбүллэрин туһалаахтык атаара сылдьааччылар эмиэ үгүстэр. Дьиэ кэргэнинэн кэлэн эмиэ хайыһарга тураллар. Даҕатан эттэххэ, билигин хайыһардыырга суолу бу Сайсарыга эрэ оҥордулар. Ону даҕаны «Чысхаан» түмсүүлэр оҥотторбуттар. Маныаха бу биир баар суох суолларын күннэтэ массыына киирэн тэпсэн эрэйи көрсөллөр. Онон массыынанан дьон күөлгэ киирбэттэрэ буоллар диэн баҕа санааларын тиэрдэллэр.