Амма Алтаныгар саҥа култуура дьиэтэ арылынна

Ырыа аргыстаах, айар-тутар дьоннордоох Алтан нэһилиэгэр саҥа култуура киинэ арыллынна. Бу түгэни нэһилиэк дьоно-сэргэтэ өр күүппүтэ. Саҥа култуура дьиэтэ саха билиилээх мелодиһа Валерий Ноев аатын сүгэр.

Василий Неустроев, СӨ култууратын үтүөлээх үлэһитэ: "Биһиги баҕа санаабыт туобутуттан сүрдээҕин диэн үөрэбит. Олох аныгы ирдэбилгэ барытыгар толору эппиэттиир култуура дьиэтэ тутуллан киирбитигэр махтанабыт".

Бу иннинэ олохтоохтор 1974 сыллаахха тутуллубут култуура дьиэтигэр айан-тутан үлэлээн олорбуттара. Онон бу саҥа киирбит култуура дьиэтэ саҥа сылга дьоһун бэлэх буолла.

Виктор Смирников, Амма улууһун баһылыгын тутууга солбуйааччы: "Икки сыл хотторон баран, үһүс сылбытыгар Бырабыыталыстыба уонна Ил дархан өйөбүлүн ыламмыт федеральнай түһүмэҕи ааспыппыт. Ити кэннэ 2022 сылтан тутуубут саҕаламмыта".

Саҥа тутуу сырдык, киэҥ-куоҥ 100 миэстэлээх көрөр саалалаах, литературнай түмэллээх, олохтоохтор, кэнчээри ыччат айар-талааннарын, дьоҕурдарын өссө сайыннарарыгар кыах биэрэр.

"Саҥа култуура дьиэтэ икки мэндиэмэннээх, тыһыынчаттан тахса кыбадыраатынай миэтэрэ иэннээх. Манна олохтоохтор уонтан тахса хайысхаҕа дьарыктаныахтара".

Маннык саҥа баараҕай тутуулар тыа сиригэр тутуллан үлэҕэ киирэллэрэ нэһилиэк олоҕо сайдарыгар, ыччат дьон тыа сиригэр үлэлииригэр, олохсуйарыгар төһүү күүс буолар.

Айсен Николаев, СӨ Ил Дархана: "Дьон – сэргэ манна түмсүө, кырдьаҕас да дьон уонна оҕолор да сайдар сирдэрэ буолуо. Улуу мелодист Валерий Ноев төрөөбүт дойдутуттан оҕолор үүнэн – сайдан тахсалларыгар саҥа култуура дьиэтин суолтата улахан буолуо".

Мантан ыла култуура эйгэтин үлэтэ - саҥа таһымҥа тахсыаҕа, дьону сомоҕолуоҕа.

Саргылаана Адамова, СӨ култууратын үтүөлээх үлэһитэ: "Бу култуура дьиэтиттэн элбэх ырыаһыт, үҥкүүһүт, искусство, култуура үлэһиттэрэ тахсыахтара диэн эрэнэбит".

Пётр Назаров, В.В. Ноев аатынан "Иэйии" култуура дьиэтин үлэһитэ: "Сып-сырдык, ып-ыраас. Манна үҥкүүһүттэр, ырыаһыттар дуоһуйа ыллыахтара, үҥкүүлүөхтэрэ". 

Амма улууһугар быйыл өссө икки улахан баараҕай тутуу киирэрэ былааннанар - саҥа үөрэх кыһата уонна балыыһа. Итиэннэ былырыыҥҥыттан саҕаламмыт Амма суолугар өрөмүөн үлэтэ салҕанар. Оттон билигин Аммалар Улуу Кыайыы 80 сылын көрсөөрү бэлэмнэнэллэр. Былааннаммыт тэрээһиннэр, үлэлэр ыытылла тураллар.