Сэллиги утары охсуһар сулууспа Саха сиригэр тэриллибитэ быйыл 100 сыла

Быһа сибээскэ Хаҥалас улууһа. Оройуон балыыһатын бырааһа фтизиатрия научнай-эмтиир киин исписэлиистэрин кытта миэстэтиттэн олорон үлэлиир. Күн бэҕэһээ көрдөрүммүт киһи номнуо бүгүн үрдүк таһымнаах быраастарга ырытыыга киирэн, сөптөөх эмтээһин ананар.   Телемедицинэ сэллик курдук ыарахан ыарыыга олус көдьүүстээҕин көрдөрдө. Ыарыһах тута ыарыы кыра эрдэҕинэ көмөнү ылар буолан.

Анатолий Сивцев, "Фтизиатрия" научнай-эмтиир киин дириэктэри эмтиир үлэҕэ солбуйааччы: «Билигин бу РТ МИС, Архимед уонна бу саамай үчүгэй ситиһиибит диэн “Облачнай поликлиника” диэн кэлбитэ. Онон диагноз туруорарга, дьоннор көрдөрөллөрө чэпчээн турар. Урут ый курдук көрдөрүнэр буоллахтарына, быйыл кылгас кэмҥэ ааһар буоллулар».

Ити курдук саҥаттан саҥа чинчийии, эмтиир ньыма сэллиги утары охсуһууга киирэ турар. Бу түмүгэ ыалдьааччы ахсаана биллэ аччыыр. Күн бүгүн Саха сирэ Уһук Илиҥҥэ бастыҥ. Оҕоҕо эмиэ көрдөрүү сыллата тупсар. Холобур, 75 куойкалаах диспансерга билигин 30 оҕо эмтэнэр. Бу эмиэ сэллиги кыайа тутарбыт туоһута. Маныаха ыарыыны эрдэ булууга саҥа ньымалар көмө буолаллар. 

Евдокия Лугинова, "Фтизиатрия" научнай-эмтиир киин дириэктэри оҕо салаатыгар солбуйааччы: «Кэнники сылларга сэллик палочкатын ДНКатын булар ньыма киирэн турар. 1-2 чаас иһигэр быһаарабыт. Уонна КТ киирэн оҕо тыҥатын үчүгэйдик көрөбүт».

Сэллик курдук ыарахан ыарыыны кыайыыга билими дьүөрэлии тутан эмтээһин ирдэнэр. Саха сиригэр бу сыстыганнаах ыарыыны утары охсуһуу саҕаланыаҕыттан 100 сыл устата үгүс научнай үлэ сурулунна. Күн бүгүн 7 билим дуоктара уонна уонтан тахса хандьыдаат үлэлиир.   Оттон үйэ устата ыытыллыбыт үлэ-хамнас фтизиатрия түмэлигэр хараллар. Онон көлүөнэ ситимэ ыарахан ыарыыны кыайарга солбуллубат күүс. Аан маҥнай 100 сыл анараа өттүгэр 3 киһилээх сулууспа тэриллибит эбит. 

Егор Прокопьев, "Фтизиатрия" научнай-эмтиир киин дириэктэрэ: «Ол бириэмэҕэ сэллик ыарыыта алдьархай тарҕанан турар кэмэ. Билиҥҥи кэмҥэ биһи 50 төгүл аччатан турабыт».

Оттон доруобуйа харыстабылын аан дойдутааҕы тэрилтэтэ туруорар соругунан 2030 сылга сэллигинэн ыалдьааччы букатын суох буолуохтаах. Сэллиги утары сулууспа 100 сыллаах үбүлүөйүнэн сыл устата араас тэрээһиннэр ыытыллыахтара.