Тыа сирин мэдиссиинэ тэрилтэлэригэр саҥа массыыналар күлүүстэрин туттардылар

Ил Дархан Айсен Николаев сабыс саҥа массыыналар аалай лиэнтэнэн бааллыбыт күлүүстэрин улуус киин балыыһаларын кылаабынай быраастарыгар туттартыыр. "Доруобуйа харыстабыла" национальнай бырайыагынан барыта 28 көлө кэлбит. Маны 21 улууска тыырбыттар. Онон сорох оройуоннар хастыы да күлүүһү туттулар. Өлүөхүмэ улууһугар бэриллибит көлөнү киин амбулаторияҕа анаабыттар.

Александр Николаев, Өлүөхүмэ улууһун киин балыыһатын сүрүн бырааһа: «Биһиги номнуо 11 саҥа массыына ыллыбыт. Бу массыына куоракка амбулаторияҕа барыа. Улахан көмө буолар. Суолбутугар бассар массыына».

Мэҥэ Хаҥалас улууһун массыыната Наахара балыыһатыгар бэрилиннэ. Уопуттаах суоппар Петр Корнилов тута уруулга олорон бэрэбиэркэлиир, тутан-хабан көрөр. Уруккулардааҕар  уратылааҕын бэлиэтиир.  

Пётр Корнилов, Мэҥэ Хаҥалас улууһун Наахара балыыһатын суоппара: «Саҥа массыына үчүгэй буоллаҕа. Дьон доруобуйатын туһугар сүүрэбит буоллаҕа. Сидиэнньэ эбиллибит, мотуордара уларыйбыттар уонна ходовойа уопсайынан уларыйбыт».

Бу массыыналар доруобуйа харыстабылын маҥнайгы тиһигэр аналлаахтар. Онон онно сөп түбэһэр гына собуокка таҥыллыбыттар. Бэриллэр тиэхиньикэ барыта "УАЗ" маркалаах. Ханнык да ыраах сиргэ эмтэнии дөбөҥ уонна түргэн буоларын тупсарыыга туһуланаллар. Сунтаар улууһа былырыын 3 массыынаны ылбыта. Күн бүгүн оройуоҥҥа көлөтүн 100 бырыһыан  саҥарта. Бүтэһик күлүүс Бүлүүчээн нэһилиэгэр туттарылынна.

Константин Павлов, Сунтаар улууһун киин балыыһатын сүрүн бырааһа: «Киинтэн 160 км ыраах сытар Бүлүүчээн диэн нэһилиэкпитигэр массыына ылыахтаахпыт. Дьон доруобуйатын туһугар сөптөөхтүк сүүрүө диэн эрэллээхпит».

Быйыл Саха сирэ доруобуйа харыстабылын маҥнайгы тиһигэр уопсайа барыта 45 анал массыынаны тутуо. Хаалбыт көлөлөр сыл устата кэлиэхтэрэ. Оттон бу сырыыга сүрүннээн тыа сирин балыыһаларын тиэхиньикэтэ саҥардылынна.

Вилюй Титов, Үөһээ Бүлүү улууһун киин балыыһатын сүрүн бырааһын солбуйааччы: «Биһиэхэ 2024 сыллаах массыынаны биэрдилэр. Тыаҕа олорор дьоҥҥо туһалыа диэн эрэнэбит. Үчүгэйдик сулууспалыа диэн бигэ эрэллээхпит».

Кэнники биэс сылга Саха сирэ доруобуйа харыстабылыгар уопсайа барыта 331 массыынаны ылла.