Саха сиригэр быйыл уопсайа 130 км усталаах суол өрөмүөннэнэрэ күүтүллэр

2025 сылга нэһилиэнньэлээх пууннар уулуссаларарын, нэһилиэктэри икки ардыларыгар баар суоллары өрөмүөннүүргэ хаһан да көрүллүбэтэх элбэх үп-харчы - 2 млрд солкуобайтан тахса харчы көрүллэрэ былааннанна. Маныаха суолу-ииһи оҥоруу барыла - "Куттала суох хаачыстыбалаах массыына суоллара" нацбырайыак "Олоххо-дьаһахха аналлаах инфраструктура" диэн ааттанан үлэтин салгыаҕа. Бу барыл чэрчитинэн, 5 млрд солкуобай тыырыллан Саха сиригэр быйыл уопсайа 130 км усталаах суол өрөмүөннэнэрэ күүтүллэр. Өрөспүүбүлүкэ суолларын Салалтата иһитиннэрбинэн, быйылгы дьылга 7 эбийиэккэ номнуо хантараак баттанан турар. 

Надежда Яковлева, СӨ суол салалтатын капитальнай тутууга салаатын сүрүннүүр инженерэ: «Үлэ кыралаан саҕаланна. Быйыл Сунтаар улууһугар уонна Өлүөхүмэҕэ муоста тутуллан бүтүөхтээх. Хаҥаласка 6 км суол аспаалланыахтаах. Мэҥэ Хаҥаласка 3.76 км суол туттарыллыахтаах. Эбийиэктэргэ күүстээх үлэ кулун тутар ыйтан саҕаланыахтаах».

Ол курдук дойду үрдүнэн 2025-2028 сылларга "Инфраструктура для жизни" диэн саҥа национальнай бырайыак иитинэн үлэ сүрүннэнэн барыаҕа. Саҥа сүүрээҥҥэ этиллибитин курдук Алдан, Нерюнгри, Мирнэй, Ленскэй куораттара хабыллыахтара. Чуолаан регионнааҕы уонна 20 тыһыынча нэһилиэнньэлээх бөһүөлэктэр истэригэр баар суоллары оҥоруохтара.Маны тэҥэ ааспыт сылга  хоту, чуолаан арктическай улуустарга суолу-ииһи оҥоруу көхтөөхтүк саҕаламмыта.

Анатолий Потапов, СӨ транспорт уонна суол хаһаайыстыбатын миниистирин бастакы солбуйааччыта: «Биһи билигин олохтоох суолларга болҕомто уурабыт. Арктика оройуоннарыгар эмиэ үлэбитин саҕалаатыбыт».

Быйыл Умнас суолугар өссө биир бөдөҥ саҥардыы үлэтэ барыахтаах, ону тэҥэ Өлүөхүмэ, Чурапчы, Мэҥэ-Хаҥалас, Сунтаар улуустарыгар суоллары саҥардыахтара.

Киин куоракка саамай уустук эбийиэгинэн Советскай Армия 50 сыла уулусса оҥоһуута буолара күүтүллэр. Бу суол үйэтигэр аан бастакытын оҥоһуллан Кальвицаттан Бабушкинаҕа диэри кэҥээн 4 балаһалаах буолара былааннанар.