Намнар Кыайыы Болотуната диэн аахсыйаларын быйыл эмиэ салгыыллар

Улуу Кыайыыны уһансыбыт дьоммут аата барыта биир сиргэ тиһиллэр. Нам иккис нүөмэрдээх оскуолатын үөрэнээччилэрэ Кыайыы болотунатын үбүлүөйдээх сылга саҥардаллар. 11 кылаас үөрэнээччитэ Света Евдокимова хорсун быһыылаахтык сэрии толоонугар охтубут  биир дойдулааҕын аатын кыһыл болотунаҕа тиһэр. Кини Аҕа дойду улуу сэриитигэр кыттыбыт дьоммутун үйэтитэр биһиги эдэр көлүөнэ ытык иэспит диэн этэр.

Света Евдокимова, Нам 2-с №-дээх орто оскуолатын 11 кылааһын үөрэнээччитэ: «Быйыл Кыайыы 80 сылынан сибээстээн ыам ыйын 9 күнүгэр биһиги “Кыайыы Болотунатын” тутан хаамар чиэскэ тигистибит. Эһээлэрбит хорсун быһыыларынан киэн туттабыт. Кинилэр эйэлээх олоҕу аҕалбыттарыгар олуһун диэн махтанабыт».

Кыайыы Болотуната аахсыйаны Нам иккис нүөмэрдээх оскуолата 2014 сылга саҕалаабыта. Бастаан ыам ыйын 9 күнүгэр Эҥсиэли хочотугар парадка тутан тахсыбыттара. Онтон салгыы Өрөспүүбүлүкэ бары оскуолаларыгар аахсыйаҕа кыттыһын диэн сурук ыыппыттар. Онтон 2015 сылга Дьокуускайга сүрүн параакка Кыайыы болотуната киин уулуссаларынан тэлээрбитэ.

Ирина Григорьева, "Кыайыы Болотуната" аахсыйа көҕүлээччитэ: «Биһи оскуолабыт оҕолоро эһээлэрин, аймахтарын ааттарын-суолларын киллэрбиттэрэ, ким ханна сылдьыбытын, ханнык сиргэ охтубутун».

Аахсыйа суолтата улаатан Нам улууһун бары нэһилиэктэринэн тарҕаммыта. Модуттар биир бастакынан кыттыһан олохтоохтор бары түмсэн нэһилиэктэриттэн ыҥырыллан барбыт эр дьонун ааттарын эмиэ үйэтиппиттэрэ. Билигин бу болотуна култура дьиэтигэр ыйанан турар.

Мария Шапошникова, Модут нэһилиэгин олохтооҕо: «Нэһилиэкпитгэр барытыгар ыҥырыы таһаарбыппыт. Бары өйөөннөр бу икки болотунабытыгар 132 киһи аатын быысыпкалаан оҥорон бүтэрбиппит».

Кыайыы болотуната аахсыйа быйыл да салҕанар. Көҕүлээбит Нам иккис нүөмэрдээх оскуолата номнуо болотуналарын саҥарда сылдьаллар. Эбии ааттар, дааннайдар эбилиннилэр. Онон ким да аата, туох да умнуллубат. Үйэтитии үлэтэ салгыы барар.