Үөһээ Бүлүү Харбалааҕар Исидор Барахов аатынан саҥа култуура киинэ арылынна

Үөһээ Бүлүү улууһугар Исидор Барахов аатынан саҥа култуура киинэ арыллынна. Бу түгэни Харбалаах нэһилиэгин дьоно-сэргэтэ күүппүтэ ыраатта. Саҥа култуура дьиэтэ үс сыл иһигэр туттуллан киирдэ.

Людмила Сергеева, "Талбаана" түмсүү салайааччыта: «Манна бары мустаммыт үлэлиэхпит. Оҕолор элбэххэ үөрэниэхтэрэ. Сайдыы буолар буоллаҕа».

Саҥа кииннэ - култуура дьиэтэ, Исидор Барахов аатынан судаарыстыбаннай түмэл, бибилэтиэкэ холбонно.

Түмэлгэ баай, историческай суолталаах экспонаттар турдулар, онтон биирдэстэрэ уһулуччулаах политическай деятель, саха чулуу уола Исидор Барахов хаартыскалара, докумуоннара тутта сылдьыбыт маллара көрдөрүүгэ турдулар.

Айсен Николаев, СӨ Ил Дархана: «Урукку сылларга бу түмэл үчүгэйдик үлэлээн. Элбэх арыйыылары оҥорон. Историятыгар улахан арыйыылары оҥорон, салгыы үчүгэйдик үлэлиэ диэн эрэллээхпин».

Бу маннык саҥа эбийиэктэр туттуллан олоххо киирэллэрэ, нэһилиэк олоҕо сайдарыгар, талааннар арыллалларыгар, ыччат дьон тыа сиригэр үлэлииригэр, олохсуйарыгар төһүү күүс буолар.

Евдокия Семёнова, И.Н. Барахов аатынан түмэл научнай үлэһитэ: «Бу саҥа тутуллубут култуура киинэ үүнэр көлүөнэҕэ саамай суолталаах буолуоҕа. Саха сирин историятын үөрэтиигэ улахан үлэни үлэлиэҕэ диэн эрэнэбит».

Бу үөрүүлээх түгэҥҥэ олохтоохтор, улаханныын кыралыын бары ох курдук оҥостон саҥа уораҕайы арыйа кэлбиттэр. Уолаттар норуодунай суруйааччы Василий Сивцев "Исидор Барахов аатын ааттыаҕын" диэн хоһоонун доргуччу, киэн тутта аахтылар. 

Мантан ыла олохтоохтор айар-талааннарын, дьоҕурдарын өссө сайыннаран, култуура эйгэтин үлэтэ - саҥа таһымҥа тахсыаҕа, дьону сомоҕолуоҕа.

Анна Герасимова, Үөһээ Бүлүү улууһун олохтооҕо: «Маннык улахан дьиэ арыллыбыта култуура сайдыытыгар, инники кэскиллэрбит үүнэн-сайдан тахсалларыгар олус тоҕоостоох буолуо дии саныыбыт».

Быйыл Өрөспүүбүлүкэ үрдүнэн өссө аҕыс култуура эбийиэгэ үлэҕэ киирэрэ былааннанар. Онон саҥа эбийиэктэр үлэҕэ киирэн, нэһилиэнньэҕэ, дьоҥҥо-сэргэҕэ дьоһун бэлэх буолуохтара.