Аҕа дойду сэриитигэр охтубут буойуттары көрдөөһүн тэриллиилээхтик ыытыллар

Кыайыы 80 сылын көрсө үөрүүлээх сонун. Тула уобалаһыгар эйэлээх олох иһин сырдык тыыннара быстыбыт Саха сирин 14 байыаһын уҥуоҕа көһүннэ.  Балар истэригэр рядовой саллааттар, офицердар бааллар. Билигин кэлбит информация бүтүннүү үөрэтиллэн, салгыы чинчийиллэн саллааттар ааттарын чопчу быһарыы үлэтэ барыа.

Вильям Иванов, СӨ бэтэрээннэрин Сэбиэтин бэрэссэдээтэлэ: «Поисковай этэрээт биһи дьоммутун булбуттар. Арааһынай сэп-сэбиргэллэригэр ааттарын суруйаллар эбит, ардыгар уордьан-мэтээл хаалбыт буолар».

Ким да умнуллубат, туох да умнуллубат. Аҕа дойду сэриитин кэмигэр олохторун толук уурбут биир дойдулаахтарбыт аатын үйэтитии өрөспүүбүлүкэҕэ тэрээһиннээхтик барар. Бу махталлаах дьыаланы ыччат дьон ылсара суолтатын өссө төгүл улаатынаннарар.  3 куурус устудьуона Юрий Иванов салайааччылаах Хотугулуу-Илиҥҥи федеральнай университет иһинэн "Отчизна" түмсүү икки сыл Тверь уобалаһыгар сырытта.

Юрий Иванов, "Отчизна" гражданскай-патриотическай иитии киинин салайааччы: «Ааспыт сылга 4 киһини булбуппут. Хомойуох иһин биир эрэ киһиэхэ медальон баар этэ, онтукабыт аҥаара эрэ хаалбыт этэ. Иллэрээ сылга 16 киһини булбуппут».

Оттон көрдөөһүн үлэтигэр Мэҥэ Хаҥалас улууһа бастыҥ көрдөрүүлээх. Манна кэнники икки сылга күүстээх үлэ баран улуустан Аҕа дойду сэриигэр аттаммыт дьон ахсаана сүүһүнэн эбилиннэ.

Айсен Николаев, Ил Дархан: «307 урукку сылларга биллибэккэ сылдьыбыт дьоннорун, биир дойдулаахтарын буланнар, өйдөбүнньүк кинигэҕэ киллэрэннэр, ол дьоннор ааттарын бу дойдуларыгар төннөрбүттэр. Сүрдээх үчүгэй холобур».

Бу саас анал көрдүүр этэрээт Ильмень күөлгэ охтубут саха уолаттарын хаһыытын салгыа. Эйэлээх олох иһин тыыннарын толук биэрбит буойуттарбытын булуу - ытык иэс.