Өрөспүүбүлүкэ киинэ тыйаатардарыгар саха киинэтэ сүрэхтэннэ

Сандал сааһы көрсө күөх экраҥҥа саҥа сахалыы киинэ сүрэхтэннэ. "Мин аатым Таптал" диэн ааттаах киинэ -  сырдык, киһи санаатын көтөҕөр, бу олоххо таптал баарын туоһулуур киинэ буолар диэн режиссер санаатын этэр.

Валентин Макаров, режиссёр: «Киһини дьоллуур күүс – таптал. Дьоннор тапталга итэҕэйэллэрин курдук санааттан бу киинэбитин устубуппут».

Бу киинэни 2023 сыллаахха сайын Нам улууһугар уонна Дьокуускай куоракка биир ый устата устубуттар. Киинэҕэ сүрүн оруолу Татьяна Легантьева оонньуур. Кини дьиэ-үлэ түбүгэр сылдьан, тус олоҕун оҥостубат кутталга киирэн, биир үтүө күн олоҕун тосту уларытарга сананар.

Татьяна Легантьева, "Мин аатым Таптал" киинэҕэ сүрүн оруолу толорооччу: «Киинэбит таптал туһунан. Оҕо куттаах киинэ. Аан бастаан устан саҕалыырбытыгар Валентин Макаров оҕоломмута. Уонна бу киинэҕэ оонньообут хас да кыыс оҕо күүтэ сылдьаллар уонна оҕоломмуттара».

Артыыс Александр Борисов бу киинэҕэ эмиэ сүрүн оруолу оонньуур. Кини кыахтаах, биллэр урбаанньыт Айаал уобараһын арыйдым, ол эрэн ыараххаттары эмиэ көрсүбүтүм диэн кэпсиир.

Александр Борисов, "Мин аатым Таптал" киинэҕэ сүрүн оруолу толорооччу: «Режиссербыт ыҥырда, киирдим, арай кыраһыабай баҕайы кыргыттар тураллар, “тылгын эт”, - дииллэр. Мин олох соһуйан баран турабын. “Стоп, дубль”, - диэн буолла. Ол ыарахан этэ».

Саҥа киинэ бу сылга саха киинэлэриттэн маҥнайгы буолар. Бастакы күнүттэн Дьокуускай куорат киинэ тыйаатардарыгар дьон толору. Айар бөлөх көрөөччүлэр сылаас тылларын, санааларын истэн үөрдүбүт диэн этэллэр.

Алексей Егоров, "Сахафильм" хампаанньа дириэктэрэ: «Бу дьоҥҥо сэргэҕэ саамай чугас көстүү буолар култуура салаатыттан. Маннык сахалыы тыллаах, тыыннаах, бэйэбит олохпут-дьаһахпыт туһунан, таптал туһунан киинэлэр куруук хайаан да баар буолуохтаахтар».

Мин аатым Таптал киинэ Өрөспүүбүлүкэ бары киинэ тыйаатардарыгар көстө турар. Онон сандал сааһы көрсө, сырдык сылаас өссө биир саха киинэтэ дьон-сэргэ көрүүтүгэр тахсыбытын көтүтүмэн.