Эпэрээссийэ сиэстэрэтин аан дойдутааҕы күнэ бэлиэтэннэ

Эпэрээссийэҕэ хас биирдии хамсаныы тыын суолталаах. Маныаха хирург уҥа илиитэ - сиэстэрэ диэн мээнэҕэ эппэттэр. Кини билиитин таһымыттан, түргэн-тарҕан туттуутуттан улахан тутулуктаах. Бу очоҕосхо уустук эпэрээссийэ бара турар. Сиэстэрэ Любовь Хорунова хирурун хамсаныытын биир хардыы инники билэн турар. Онон эндэппэккэ туһааннаах үнүстүрүмүөнү, биинтэни биэрэн иһэр. Любовь  хас эмэ сүүһүнэн эпэрээссийэҕэ турбут улахан уопуттаах исписэлиис.

Любовь Хорунова, Өрөспүүбүлүкэтээҕи 2-с №-дээх балыыһа эпэрээссийэ сиэстэрэтэ: «Соһул көмөҕө түүннэри-күнүстэри кэлэллэр. Онно бэлэм буолуохтааххын. Номнуо туох эпэрээссийэҕэ ханнык үнүстүрүмүөн барарын, ханнык шов барарын, бырааска ханнык бэрэчээккэ кэтэрдэргин барытын билэн туруохтааххын уонна тулуурдаах буолуохтааххын».

Ити курдук эпэрээссийэ сиэстэрэтигэр ирдэбил хирурга курдук эмиэ улахан. Дьиҥ идэлэрин таптыыр дьон эрэ кыайар, уустук үлэтэ. Сорох эпэрээссийэ 8-10 чааска диэри уһун буолуон сөп. аны маны таһынан сууккаҕа 20 тиийэ суһал эпэрээсси йэ баар буолар.  Өрөспүүбүлүкэтээҕи 2№-дээх балыыһаҕа түүннэри -күнүстэри үлэ тохтообокко барар. Манна уопсайа 11  эпэрээссийэлиир отделение баар.

Ирина Нифонтова, Өрөспүүбүлүкэтээҕи 2-с №-дээх балыыһа Суһал көмө салаатын аҕа сиэстэрэтэ: «Эпэрээссийэ сиэстэрэтэ диэн сүрүн уратылаах, туспа соло, салааҕа курдук буолбатах, манна хирург көмөлөһөөччүтэ, кини сиэстэрэтэ суох кыайан үлэлээбэт. Күҥҥэ уопсайа 30-ча эпэрээссийэ уонна суһал көмө эпэрээссийэлэрэ буолаллар. Нэдиэлэҕэ 200-кэ эпэрээссийэ оҥоробут».

Эпэрээссийэҕэ турар сиэстэрэ быраастары кытта тэҥҥэ үөрэнэр, кылааһын үрдэтэр, туһааннаах көҥүлү ыйыллыбыт болдьоххо ылар.   Хирургия тэтимнээхтик сайдар салаа. Оттон өрөспүүбүлүкэтээҕи 2№-дээх балыыһа бары хайысханы хабар балыыһа.

Николай Сидоров, Өрөспүүбүлүкэтээҕи 2-с №-дээх балыыһа сүрүн бырааһын хирургия чааһыгар солбуйааччы: «Биһиэхэ 40-ча сиэстэрэ үлэлиир. Хирурга сиэстэрэ уҥа илиитэ буолар. Былырыыҥҥаттан Ил Дархан этиитинэн мобильнай хирургическэй биригээдэ тэриллибитэ. Онно куруутун икки сиэстэрэ сылдьар».

Эпэрээссийэ сиэстэрэлэрин сыл аҥаардыыта буола буола отделениеларын уларыталлар. Онон хайа баҕар ыарыыны эмтээһиҥҥэ көмө буоларга куруук бэлэмнэр.