Сылыйыы күүтэр

Ааспыт нэдиэлэ бүтүүтэ орто сибиирдээҕи антициклон күүһүрэн Саха сирин үгүс улуустарыгар тымныы күн-дьыл турда. Сорох хоту улуустарга 50 кыраадыска диэри тиийэ сырытта. Оттон сыыйа ол тымныы күүһэ мөлтөөн бу нэдиэлэ ортотуттан халлаан сылыйара күүтүллэр. Чуолаан Тиихэй океантан кэлбит сис былыт кэккэ улуустарга хаары, тыалы аҕалыаҕа.

Саргылаана Никитина, Дьокуускайдааҕы күнү-дьылы кэтээн көрөр  сулууспа күн-дьыл туругун сылыктыыр салаатын салайааччыта: «Хотугулуу-илин оройуоннарга чэппиэр, бээтинсэ күн хаардыа. Түүнүн -35- - 45 кыоаадыска диэри сылыйыа. Арай хотугулуу-арҕаа уонна арҕаа улуустарга кыралаан хаардыа, сылаас күн-дьыл туруо».

Олунньу саҕаланыаҕыттан сүрүннээн өрөспүүбүлүкхэ үгүс улуустарыгар хаардаах тыаллаах күн-дьыл турар. Ааспыт нэдиэлэлэргэ эмиэ Лаптев муоратыттан сис былыт күүстээх тыалы, буурҕаны, хаары аҕала сылдьыбыта. Бу сырыыга эмиэ Анаабыр, Булуҥ улуустарыгар сөкүүндэҕэ 20 миэтэрэҕэ тиийэр күүстээх тыал, буурҕа түһэрэ сабаҕаланар. Олунньу 12 күнүттэн дьыбар тахсар буолар. Бүгүн норуот итэҕэлинэн Иккис Охонооһойоп, дьыл оҕуһун иккис муоһа тостор, тымныы күүһэ биллэ сыппыыр, мөлтүүр.

"Олунньу 1 күнүттэн Дьокуускайга 3 ыйдаах санитарнай ырааһырдыы кэмэ биллэриллэн турар. Ол курдук кыһын устата мунньуллубут бөҕү-саҕы, мууһу, хаары тиэйии-таһыы эбилиннилэр диэн этиэххэ наада. Суол үлэһиттэрин тэҥэ муниципальнай дворниктар көмөлөрүнэн дьон сатыы сылдьар сирдэрин ыраастааһын барар", - Татьяна Николаева

Бу киин Октябрьскай уокурук дворниктара 31 №-дээх оскуола эргин киэҥ территориятын ыраастыы сылдьаллар. Уопсайа 7-8 дворник сарсыарда 8 чаастан саҕалаан араас эбиийэктэринэн үлэлиир. Хаҥалас улууһун Булгунньахтааҕыттан төрүттээх Владимир Чемезов дворнигынан үлэлээбитэ балачча кэм буолла.

Владимир Чемезов, Октябрьскай уокурук муниципальнай дворнига: «Биһиги ахсааммыт элбэх. Билигин сорохпут атын эбиэккэ үлэлии сылдьаллар. Кыра тыраахтыр чиҥдини хоҥуннаран биэрэр. Оттон тиэхиньикэ киирбэт сирин илиибитинэн көйөбүт».

Күнтэн-күн маннык ыраастааһын үлэтэ бары күүһүнэн тэриллэр. Дворнктары тэҥэ куорат суолга-иискэ тутаах тэрилтэтин үлэһиттэрэ эмиэ күн солото суохтар.Тохсунньу ый түмүгүнэн 60-тан тахса тыһыынча кууб хаары тиэйдилэр, халтарааны утары 5 тыһыынчатттан тахса туонна кумах куттулар.