Сэллиги утары охсуһар сулууспа Саха сиригэр тэриллибитэ 100 сыла

Быһа сибээскэ Хаҥалас улууһа. Оройуон балыыһатын бырааһа фтизиатрия научнай-эмтиир киин исписэлиистэрин кытта миэстэтиттэн олорон үлэлиир. Күн бэҕэһээ  көрдөрүммүт киһи номнуо бүгүн үрдүк таһымнаах быраастарга ырытыыга киирэн, сөптөөх эмтээһин ананар.   Телемедицинэ сэллик курдук ыарахан ыарыыга олус көдьүүстээҕин көрдөрдө. Ыарыһах тута ыарыы кыра эрдэҕинэ көмөнү ылар буолан.

Анатолий Сивцев, "Фтизиатрия" научнай-эмтиир киин дириэктэри эмтиир үлэҕэ солбуйааччы: "Саамай бастыҥ ситиһиибит бу “Облачная поликлиника” диэн кэлбитэ. Бу бырагыраамаҕа ыарыыны быһаарар, дьоҥҥо чинчийиини ааһалларыгар чэпчээн турар. Эрдэ биир ый барар буоллахтарына, билигин олус түргэн".

Ити курдук саҥаттан саҥа чинчийии, эмтиир ньыма сэллиги утары охсуһууга киирэ турар. Бу түмүгэ ыалдьааччы ахсаана биллэ аччыыр. Күн бүгүн Саха сирэ Уһук Илиҥҥэ бастыҥ. Оҕоҕо эмиэ көрдөрүү сыллата тупсар. Холобур, 75 куойкалаах диспансерга билигин 30 оҕо эмтэнэр. Бу эмиэ сэллиги кыайа тутарбыт туоһута. Маныаха ыарыыны эрдэ булууга саҥа ньымалар көмө буолаллар. 

Евдокия Лугинова, "Фтизиатрия" научнай-эмтиир киин дириэктэри оҕо салаатыгар солбуйааччы: "Кэнники сылларга биһиэхэ оҕо сэллигэр сэллик палочкатын ДНК-тын булар ньыма киирэн турар. Манан 1-2 чаас иһигэр сэллик баар дуу суох дуу диэн быһаарабыт. Итини  сэргэ томограмма киирэн үчүгэйдик сыныйан көрөбүт".

Сэллик курдук ыарахан ыарыыны кыайыыга билими дьүөрэлии тутан эмтээһин ирдэнэр. Саха сиригэр бу сыстыганнаах ыарыыны утары охсуһуу саҕаланыаҕыттан 100 сыл устата үгүс научнай үлэ сурулунна. Күн бүгүн 7 билим дуоктара уонна уонтан тахса хандьыдаат үлэлиир.   Оттон аан маҥнай 100 сыл анараа өттүгэр 3 киһилээх сулууспа тэриллибит эбит. 

Егор Прокопьев, "Фтизиатрия" научнай-эмтиир киин дириэктэрэ: "Аа -дьуо икки сыл буолан баран коллектив тэриллэн киирэн барар. Ону тэҥниир буоллахха, ыарыы күүскэ тарҕанан турар кэмэ. 50 сылы тэҥниир буоллахха билиһин биһиги 50 төгүл аччатан турабыт".

Оттон доруобуйа харыстабылын аан дойдутааҕы тэрилтэтэ туруорар соругунан 2030 сылга сэллигинэн ыалдьааччы букатын суох буолуохтаах. Сэллиги утары сулууспа 100 сыллаах үбүлүөйүнэн сыл устата араас тэрээһиннэр ыытыллыахтара.