Сиэмэ сыаната быйыл хайдаҕый?

Иван Лукин Агротехнологическай университет ойуур комплексыгар уонна сири оҥоруутугар факультетын иккис кууруһун устудьуона. Үүнээйи рассадатын олордууга практическай уруок. Петуния сибэкки сиэмэтин буорга олордуу түбүгэ. Эрдэттэн буорун бэлэмнээн биирдии устуука сиэмэни сэрэнэн буорга түһэрэллэр. 

Иван Лукин, АГАТУ устудьуона: "Буорбут састаабыгар торф, кумах уонна хара буор киирэр. Маны барытын бииргэ булкуйан баран фитоспарин диэни кутабыт. Бу рассада ыалдьыбатыгар көмөлөһөр". 

Сыллата университет бэйэтин теплицэтигэр 80 тыһыынчаҕа тиийэ сибэкки, оҕуруот аһын рассадатын олордор. Быйыл эмиэ үтүмэн элбэх үүнэйини олордор сорук турар. Холобур, бу биэрэс сиэмэтин номнуо илитэ уурдулар. Биир бастакынан ахсынньы ыйтан саҕалаан түргэнник ситэр сибэккилэри олортулар. 

Светлана Владимирова, АГАТУ агрономияҕа уонна химияҕа кафедратын доцена: "Эрдэ үүннэриллэр сибэккилэри олортубут. Холобур, лабелиябыт номнуо таҕыста. Ахсынньыттан, тохсунньуттан дьаабылыка маһын олордо сылдьабыт. Сиэмэннэн ыспыппыт. Атыыга диэн олортубут".  

Быйыл Дьокуускай уопсастыбаннай сирдэригэр анаан араас сибэккини үүннэриэхтээхтэр. Онон мантан саас түбүк элбэх. Рассада олордуутугар, көрүүтүгэр-истиитигэр күннэтэ устудуьоннар көмөлөһөллөр.  Билигин оҕуруот аһын олордооччуларга, сибэкки үүннэрээччилэргэ түбүктээх кэм. Ол курдук сиэмэ талыыта, атыылаһыыта киин болҕомтоҕо сылдьар. Маннык туһааннаах маҕаһыыннарга киһи кэлиитэ элбиир.

Анджела Николаева, маҕаһыын  атыыһыта: "Билигин ордук биэрэс сиэмэтин ылаллар. Маны тэҥэ номнуо үүммүт сибэккини атыылаһаллар, үнүгэһиттэн элбэх сибэкки ылаары". 

Оҕуруот олордуута биллэн турар күүһү-уоҕу, сыраны, бүөбэйдээһини эрэйэр. Ону тэҥэ, үп-харчы эмиэ аҕыйаҕа суох барар. Аҥаардас сиэмэ, буор, уоҕурдуу, битэмиин, тэрил, иһит-хомуос, фитолампа ыларга ботуччу суумманы хаалларан тахсаҕын, быйыл ааспыт сыллааҕар сыана эмиэ үрдээн турар.

Татьяна Николаева, корреспондент: "Хас биирдии сибэкки сиэмэтэ араастаһар, көннөрүлэр, ампулалаахтар бааллар. Оттон сыаната суордуттан тутулуктанар. Холобур, бу биир сыллаах бархатцы сиэмэтэ 29 солкуобай буоллаҕына сорох сибэккилэр сиэмэлэрэ 500 солк. кытта тиийиэхтэрин сөп". 

Уоҕурдуу, үүнүүнү көҕүлүүр эбилик эгэлгэтин дьон эмиэ хамаҕатык атыылаһар. Сиэмэни талыы эмиэ туспа ымпыктардаах, хаачыстыбалаах эрэ сиэмэ учугэйдик силигилээн тахсар. Уопуттаах оҕуруоччуттар сиэмэ түргэнник үүнэригэр көҕүлүүр араас ньымалары туһаналлар уонна бэрэбиэркэлэммит сиртэн атыылаһаллар.