Модуттар хаарбах балыыһаҕа үлэлииргэ күһэллэллэр

Модут балыыһатын үлэһиттэрэ күннэтэ хаарбах усулуобуйаҕа үлэлииргэ күһэллэллэр. Участковай сиэстэрэ Светлана Шапошникова балыыһа хас биирдии муннугун, үүтүн-хайаҕаһын биһиги устар бөлөххө көрдөрөр. Кини манна күнүн улахан аҥаарын атаарар. Онон үлэлиир усулуобуйата тупсарыгар сүрэҕинэн-дууһатынан ыалдьар. Ол эрэн, төһө да эргэ дьиэ буолбутун иһин наадалаах тэрилинэн син хааччыйыы баар диэн этэр.

Светлана Шапошникова, Модут балыыһатын участковай сиэстэрэтэ: "Хааччыллыы өттүттэн эттэххэ, сороҕо эргэ. Аҕыйах саҥа миэбэл баар. Онон маннык хаарбах дьиэҕэ үлэлии олоробут диэххэ сөп. Эминэн хааччыллыы үчүгэй".

Модут нэһилиэгэр балыыһа 1991 сыллаахха олохтоохтор бэйэ күүстэринэн, кыахтарынан тутуллубута.  Ол кэмтэн ыла  34 сыл ааста. Бу сыллар тухары нэһилиэк дьаһалтата, балыыһа үлэһиттэрэ бэйэ күүстэринэн өрөмүөннүү сатаабыттара да кыаллыбатах. Маныаха бу эрдэ тутулларыгар миэстэтин соччо суоҕу талбыттар. Уруккута уу турбут сиригэр туппуттар.

Балыыһа дьиэтин аҥаардас киһи тас көстүүтүттэн дьиксинэр. Кырааска барыта түһэн саккырыы турар. Дьиэ үрдэ сотору-сотору ардахха-хаарга тэстэн, өһүөтэ сиҥнэн эрэр. Дьиҥэ бу эбийиэк биир бастакынан хаарбах туруктаах эбийиэктэр испииһэктэригэр киирбит. Доруобуйа харыстабылын министиэристибэтин иһинэн саҥа тутуллар медицинэ эбийиэктэрин  бырагырааматыгар номнуо 7 сыл аннараа өттүгэр киирэн турар. Ол эрэн, балаһыанньа дьэ көнөр сибикилээх.

Ефим Гоголев, Модут нэһилиэгин баһылыга: "Оскуола аһыллыытыгар Ил Дархан Айсен Сергеевич Николаевка сурукпутун туттарбыппыт. Быһаарыыта туох диэн буолбуппут. Ол эрэн бырабыыталыстыба өттүгэр сурукпут үлэлээн эрэр. Нэһилиэнньэ саҥа балыыһаны олус күүскэ туруорсар".

Нэһилиэк олоҕо биир хаарбах дьиэттэн тутулуктанар. Онон оттон туһааннаах биэдэмистибэлэргэ сурук тиийэн сотору кэминэн Модуттар ыра санаалара туолуох тустаах. Быйы саҥа оскуола киирэн санаалара өрө көтөҕүллүбүтэ, оттон аны саҥа балыыһа киирдэҕинэ нэһилиэк олоҕо биллэ тупсуо турдаҕа.