Айылҕаттан иэйии ылан

Ырыа бастакы тылларыттан киһи кута-сүргэтэ арыллан, тутатына айымньы киһи сүрэҕэр киирэр. "Саха тыына" ырыа ааптара, ырыаһыт Кэбээйи Мастааҕыттан төрүттээх, билигин мэҥэлэр күтүөттэрэ Алексей Слепцов - Атасхаан. Эдэр киһи оскуола саҕаттан айар кут абылаҥар ылларбыт.

Алексей Слепцов — Атасхаан, ырыаһыт, композитор, мелодист: «Бэйэм айар үлэбин кыра саастан саҕалаабытым. Ол курдук 5 кылаастан ырыа суруйабын. Бастаан барыта таптал туһунан этэ. Онтон кэлин куоракка көһөн баран төрөөбүт дойдуга таптал, сахалыы тыын, доҕоттор тустарынан айар буолбутум. Оттон “Уол оҕо” диэн ырыабын бу кэлин суруйбутум».

Билигин эдэр киһи номнуо дьоҥҥо сөбүлэппит "Дорообо дойдум", "Уол оҕо", "Доҕоттор" онтон да атын ырыалара киэҥ эйгэҕэ дьон биһирэбилин ылла. Оттон киһи сэргии истэр ырыаларын Алексей барытын бэйэтэ айан таһаарар.

Алексей Слепцов — Атасхаан, ырыаһыт, композитор, мелодист: «Мэҥэ Хаҥаласка Хорообукка сылгыһытынан үлэлии сылдьыбытым, онно 6 чаастан туран аһаталаан баран, алаастарынан бараҕын. Ол онно айылҕаҕа иэйии киирэр».

Маныаха ырыалара олоххо киирэригэр улахан көмөнү, сүрэҕин аҥаара, кэргэнэ көмөлөһөр эбит. Өйгө киирбит ырыа тылын сурукка тиһэн. Билигин Алексей дьиэ кэргэнин кытары Майаҕа олороллор. Онон улуус иһигэр айар-тутар, ыллыыр.

Андрей Васильев — Айастаан, композитор, мелодист: «Алта ырыаны оҥорбуппут. Ол кэннэ бэйэм ырыалардаахпын диэбитэ, ону оҥорон саҕалаабыппыт. “Дойдум тыына”, “Уол оҕото” диэн ырыалары уһулбуппут».

Билигин эдэр, талааннаах ырыаһыт Алексей Слепцов - Атасхаан былаана киэҥ. Өссө да саҥа ырыалары айан-тутан таһаарар соруктаах. Ырыа улахан түһүлгэтигэр киирэр сыаллаах.