Мэҥэ Хаҥаласка 200-тэн тахса бааһынай хаһаайыстыба баар

Дьөһөгөй куттаах Хара нэһилиэгэр Уодай диэн ааттаах ытык сиргэ, сыспай сиэллээҕи тутар Лукин бааһынай хаһаайыстыбата кыһыҥҥы ортолотто. Күн бүгүн манна 106 сылгы кыстыгы этэҥҥэ туоруу турар.

Оттон бу хаһаайыстыбаны удьуор сылгыһыттар уоллара, Ефрем Семенович уонна Ефрем Ефремович Лукиннар уоллара, билигин хаһаайыстыба салайааччытынан үлэлии сылдьар Аркадий Лукин салайан илдьэ сылдьар. Кини этэринэн быйылгы кыстык кинилэргэ этэҥҥэ. Онно төһүү субсидия. 

Аркайдий Лукин, “Чүүйэ” хаһаайыстыба салайааччыта: «Улууспут субсидия эбии харчы көрөр, ол иһин чэпчэтиилээх бурдугу ылабыт. 550 солк. төлүүбүт биир куулга. Сүрдээҕин үчүгэй көмө, наһаа табыгастаах. Өрөспүүбүлүкэ үрдүнэн биһиэхэ эрэ инник баар. Ол иһин сылгыбытын үчүгэйдик аһатабыт».

Хара нэһилиэгэ былыр былыргыттан Дьөһөгөй оҕотун өрө тутан, үгүс элбэх сылгыһыттардаах сир буолар. Манна холобура, бүгүҥҥү күн туругунан 400-тэн тахса сылгы баара биллэр. Билигин манна чииптээһин үлэтэ күүскэ бара турар.

Дария Назарова, Хара нэһилиэгин баһылыга: «Биһи нэһилиэкпитигэр чииптээһин бара турар. 312 сылгыбыт чииптэннэ. Салгыы бу саас ол үлэ барыа. Манна Уодай сиригэр былыр-былыргаттан сылгы баазата баар этэ уонна сүүрүк сылгылары тутар сир этэ».

Уопсайынан, Мэҥэ Хаҥалас улууһугар тыа хаһаайыстыбатыгар улахан болҕомто ууруллар. 3 сыллаах күүһүрдүллүбүт үлэ бэйэтин биллэрэр. Үүккэ, окко былаан туолар.

Иннокентий Семёнов, Мэҥэ-Хаҥалас улууһун тыа хаһаайыстыбатын салалтатын салайааччыта: «Кыстыкка быйыл толору оттоох киирэн турабыт. Улуус үрдүнэн 39 тыһ. туонна оту бэлэмнээбиппит. Ону таһынан туораахтаах култуураны ыһабыт. Былырыын 1400-тэн тахса га ыһан 850 туонна бурдук ылбыппыт».

Манна даҕатан эттэххэ, өрөспүүбүлүкэ урдунэн 117 тыһынычаттан тахса сыспай сиэллээх кыстыгы этэҥҥэ туоруу турар. Билигин эбии аһылыкка 35 тыһынчаттан тахса сылгы киирдэ. Хаһыы этэҥҥэ.