Өрөспүүбүлүкэ хаһаайыстыбаларыгар кыстык оройо

"Чүүйэ" хаһаайыстыба биир тутаах үлэһитэ Роман Алексеев хороҕор муостаахтары буоһатыыга сүрүн исписэлиис. Билигин кини үлэтин түмүгэ, олунньу ыйга үгүс элбэх саҥа төрөөбүт ньирэй.

Тустаах хаһаайыстыба  үлэтин уратыта - буоһаатыы. Онон билигин манна соторутааҕыта төрөөбүт ньирэйдэр мэҥирэһиилэрэ хотону толорор. Ол да буоллар бу хайысхаҕа үлэ өссө да элбэх диэн зоотехник кэпсиир.

Роман Алексеев, "Чүүйэ" хаһаайыстыба зоотехнига: «Билиҥҥи туругунан 163 төбөттөн 10 кытарах. Ыйга 7-10 төрүүр».

Чүүйэ хаһаайыстыба 2013 сыллаахтан арыллан үлэтин саҕалаабыта. Оччолорго Алтаай кыраайыттан 200 красно-степной боруода сүөһүнү аҕалан, иитэн, ууһатан, күн бүгүн хаһаайыстыбаҕа 310-тан тахса хороҕор муостаах кыстыгы этэҥҥэ туоруу турар. Үрүҥ илгэ үрүйэлии устар.

Аркадий Лукин, "Чүүйэ" хаһаайыстыба салайааччыта: «Кыһыҥҥы үүккэ үлэлээрибит кыһын төрүүр тиҥэһэлэри ылан кэлбиппит. Уонна кыһынын үлэһит көстөр».

Манна даҕатан эттэххэ, Чүүйэ хаһаайыстыба улууһу үүтүнэн хааччыйа олорор. Былырыын 300 туонна үрүҥ илгэ туттарыллыбыта. Маныаха хаһаайыстыба үлэтигэр биир уратылаах  - ынахтар баайыллыыта суох сылдьаллар.

Иннокентий Семёнов, Мэҥэ-Хаҥалас улууһун тыа хаһаайыстыбатын салалтатын салайааччыта: «Бааллыбат, хаама сылдьан иитиллэр сүөһү. Саахтара установканан тарыйыллар уопсай дьаамаҕа».

Мэҥэ-Хаҥалас улууһугар 2023 сылтан тыа хаһаайыстыбатын үс сыллааҕы күүстээх үлэтэ биллэриллибитэ. Ол чэрчитинэн тустаах хаһаайыстыбаҕа Калуга уобалаһыттан 25 сычевскай сэммэнтээл боруода ынахтары аҕаланнар үлэ күөстүү оргуйар.