Горнай улууһун бары нэһилиэктэригэр Бырабыыталыстыба отчуоттара буолла

Бырабыыталыстыба отчуоттара саҕаланнылар. Бастакы күн Горнай улууһугар култуура уонна духуобунай сайдыы миниистирэ Афанасий Ноев, үп миниистирин солбуйааччы Николай Старостин уонна тыа хаһаайыстыбатын миниистирин солбуйааччы Прокопий Николаев салайааччылаах үс бөлөх  Маалтааны, Маҥаны, Солоҕон, Мытаах, Октябрьскай, Атамай нэһилиэктэринэн үлэлээтилэр. Олохтоохтору кытта тус көрүстүлэр. 

Николай Старостин, СӨ Үп миниистирин солбуйааччы: «Никита Викторович салайар кэмигэр элбэх үлэ ыытылла турар. Тыа хаһаайыстыба өттүнэн, суол-иис боппуруостарыгар, социальнай эбийиэктэри тутуу».

Олохтоохтор салалта дьонугар долгутар кыһалҕаларын быһааралларын туруорустулар. Ол курдук Бэс Күөлтэн 5 килэмиэтир тэйиччи сытар Ытык Эбэ сайылыгар уот остуолбаларын сөргүтэн уот тардыытын, сэтиэнэх сирдэри ыраастааһыны, 2015 сыллаахха үтүө дьыаланан тутуллубут оҕо уһуйаанын өрөмүөннүүрү. Ону тэҥэ социальнай төлөбүрдэри ылыыга дохуоттара аҕыйах, ол эрэн сирдэрэ элбэх дьон хапсыбаттарын, Кэскил түөлбэтигэр баһаар кэннэ тутуллубут улахан дьиэлэр  муосталарынан тымныйалларын, уматык сыаната ыарыы турарын, үүт тутар харчы кыратын, онтон да атын боппуруостарга санааларын этиннилэр.

Фёкла Иванова, атамай нэһилиэгин олохтооҕо: «Гаас тарыыба үрдээбитин ыйыталастым».

Вера Новикова, Маалтааны нэһилиэгин олохтооҕо: «Саас суолбут боппуруоһа уустук буолар. Ол боппуруоһу элбэхтэ туруорсан турабыт. Ол боппуруоспут көрүллэн билигин өрөмүөн үлэтэ күүскэ бара турар».

Оттон Күөрэлээх олохтоохторо быраҕыллыбыт ходуһа сирдэри оҥорууну,  эргэ мас дьиэҕэ олорор 70-саастарыттан үөһээ кырдьаҕастарга дьиэлэрин өрөмүөннэнээллэригэр  көмө харчы көрүллүүтүн, 2011 сыллаахха "Үтүө дьыала" тосхолунан тутуллубут сынньалаҥ дьиэтин хапытаалынай өрөмүөнүн, уот-күөс, аппаратура саҥардыллыытын туруорустулар.

Елена Жиркова, Күөрэлээх бөһүөлэгин Сынньалаҥ дьиэтин дириэктэрэ: «Хапытаалынай өрөмүөн кулууппутугар ыытыллыбакка турар».

СӨ бырабыыталыстыбатын бэрэссэдээтэлин солбуйааччы Ольга Балабкина салалталаах бөлөх иккис күн улуус үс нэһилиэгэр Одунуга, Аһымаҕа уонна Бэрдьигэстээххэ үлэлээтилэр.