Дьокуускайга "Кыһыҥҥы саад" диэн билии бэстибээлэ аһылынна

Наука уонна искусство дьүөрэлэһиитэ. Кыһыҥҥы саад диэн ааттанар билии бэстибээлэ быйыл 4 хайысханан салаллан барыаҕа. Ол курдук манна библиотека иккис этээһигэр худуоһунньук, фотограф бэйэтэ ботаник идэлээх Айталина Ефимова үлэлэрэ турдулар. Бу үлэлэргэ фестивал тэрийээччитэ - ботаническай саад ураты үүнээйилэрэ хартыына быһыытынан ойууланаллар. Иккис хайысханан бэрт интэриэһинэй айар күрэх буолар. 

Холобура, бу Аал-луук мастаах олонхо дойдутун оҥоһук өй маннык ойуулаан таһаарбыт. Халлааҥҥа тардыспыт аптаах маһы кыыс, көтөр-сүүрэр сэргээн көрөн турара көстер. Онтон бу неоновай өҥнөөх муус мастаах дойду баар.  Бу космос сибэккитэ киэҥ куйаарынан дайар. Хас биирдии нейросеть живопиһа киһи фантазиятын уһугуннарар, сөхтөрөр.  Манна кыайан уруһуйдаабат да киһи программа көтөтүнэн бэйэтин көрүүтүн оҥорон таһаарын сөп.

Александра Ермолаева, ХИФУ ботаническай саадын декоративнай үүнээйилэргэ салаатын салайааччы: «Бу куонкуруска улахан дьон кытыннылар. Саха сирэ эрэ буолбакка Арассыыйа уонна тас дойдулартан эмиэ үлэлэр бааллар».

Бэстибээл салгыы түһүмэҕинэн Тыыннаах төрдүбүт диэн саха норуотун олоҕор-дьаһаҕар киэҥник тэнийбит үүнээйилэр хайысхалара буолар. Өбүгэлэрбит олохтоох от-мас туһунан баай билиилэрин, кинилэр харыстабыллаах сыһыаннарын туһунан сиһилии билисэххэ сөп. Библиотека үлэһитэ Петр Атласов быыстапканы сэргии көрдүм диэн этэр.

Пётр Атласов, Дьокуускай олохтооҕо: «Киһи бэйэтэ кэрэҕэ тардыһар буоллаҕына, олоҕун киэргэтэ сатыыр буоллаҕына, холобур мантан ылыан сөп курдук өйдөөтүм».

Уонна төрдүс хайысхананы үөрэтэр-сырдатар үлэ ылар. Манна үүнэр өрөбүл күннэргэ лекциялары, семинардары, маастар-кылаастары тэрийэн ыытыахтара.