Саха сирин хапсаҕайа бастакытын норуоттар икки ардыларынааҕы таһымҥа таҕыста

Триумф спорт уораҕыйыгар көрөөччү толору. Саха дьоно-сэргэтэ күүтэр, саха успуордун биир бастыҥ чаҕылхай турнира Хаҥалас Хапсаҕайа саҕаланна.

Тыҥааһыннаах киирсиилэр икки күн устата буоллулар. Өрөспүүбүлүкэттэн эрэ буолбакка, Арассыыйаттан, аан дойдуттан тиийэ күүстээх бөҕөстөр биир сиргэ түмсэн күөн көрүстүлэр.

Андрей Яковлев, сүрүн судьуйа: «Күүстээх турнир буола турар. 85, 95 уонна 95-тэн үөһээ. Уонна бэтэрээннэргэ 80, 90 уонна 90 үөһээ».

Чурапчы улууһуттан сылдьар Никита Софронов бу турнирга иккис сылын кыттар. Сылын аайы бу күрэх таһыма үрдээн  кыттааччыта халынаан иһэр диэн санаатын үллэстэр.

Никита Софронов, күрэхтэһээччи: «Биһиэхэ хапсаҕай сайдыытын бу күрэҕинэн көрүөххэ сөп. Улахан ыйааһыннарга үчүгэй уолаттар кэлбиттэр».

Турнирга барыта 400-тэн тахса спортсмен кыттынна. Күрэх быйыл аан бастакытын норуоттар икки ардыларынааҕы таһымҥа ыытыллар, онон кыттааччы да, көрөөччү элбэх. Хамаандалар анаан-минээн күүстээхтик бэлэмнэн, турунан кэлбиттэр.

Мамука Гелядзи, Грузия хамаандатын тренерэ: «Этот вид похож на наш национальный и наши спортсмены участвуют успешно».

Уопсай призовой пуонда алта мөлүйүөн. Кыайыылаахтарга ураты мэдээл, сертификатынан харчы итиэннэ саха батыйатын туттардылар.

Вячеслав Нестеров, күрэх сүрүн тэрийээччитэ: «Неолимпийскай видка киирсэр. Олимпийскайдары барытын бобон тураллар. Ол иһин бу видтар сүрдээҕин сайдан эрэллэр. Былырыын спорт миниистэрин Дягтерев Михаил Владимирович бастакы Укааһа тахсыан иннинэ, Бишкекка бастакы чемпионат мира ыыпыппыт. Онон хапсаҕайбыт аан дойдуга сайдан иһэр».

Хас да төгүллээх Саха сирин чемпиона, аан дойдутааҕы турнирдар призердара Ньургун Сергин бэйэтин ыйааһыныгар 95 киилэҕэ тэннээхтэрин булбата. Дойдубар кыттар буолан олус долгутулаах, чугас дьоннорум ыалдьа кэлбиттэр, онон эппиэтинэс үрдүк диэн этэр.

Ньургун Сергин, эдэрдэргэ 90-тан үөһэ киилэҕэ кыайыылаах: «Тэрээһин саамай үрдүкү таһымҥа оҥоһуллубут. Атын дойдулартан кэлэн конкуренция бөҕөтүн оҥоро сылдьаллар. Туох баарбытынан кииристибит, ким бэлэмнээх – ол кыайдаҕа».

Бу курдук күрэхтэһии үрдүк таһымнаахтык ыытыллынна. Тэрийээччилэр инники былааннара киэн. Аны бу күһүн Чувашияҕа ыытыллыахтаах иккис аан дойдутааҕы оонньууларга кытта барарга бэлэмнэнэллэр. Оттон эһиил Дьокуускай куоракка хапсаҕайга Аан дойду чемпионатын ыытар былааннаахтар.