Мэҥэ Хаҥалас хаһаайыстыбаларын үлэлэрин суруналыыстарга көрдөрдүлэр

Кып-кырачаан ньирэй үрүҥ илгэни утаппыттыы иһэр. Оттон кини бөлүүн түүн суруналыыстар десааннара уонна тыа хаһаайыстыбатын миниистирэ Артем Александров кэлиэн эрэ иннинэ күн сирин көрбут. Онон тарбыйаҕы Миниистир диэн сурэхтээтилэр.

Марина Васильева, "Үлэ киһитэ" анал аат хаһаайката: «Бэҕэһээ соһуччу киэһээ 11 чааска төрөөбүт. Иннэ гынан Миниистир буолан күн сирин көрөн турар. Бастакы ньирэйбит».

Улахан таһымнаах тэрээһини билбиттии күн сир көрбүт ньирэй, идэһэҕэ барбакка, аны ууһатыыга барыаҕа диэн 1982 сыллаахтан Хорообут хаһаайыстыбатыгар бэриниилээхтик, үтүө суобаастаахтык үлэлии сылдьар Марина Васильева суруналыыстарга кэпсээтэ.

Арыы ирэригэр анал оборуудабанньа нөҥүө ньыһылларын кэлбит ыалдьыттар салгыы "Алаас-ас" кээпирэтипкэ кэлэн илэ харахтарынан көрдүлэр. Бу күн үлэ хаамытыын улуус эрэ иһигэр буолбакка, өрөспүүбүлүкэҕэ саамай минньигэс Хорообут арыытын оҥоһуллуутун, таптайыытын суруналыыстары кытары миниистир көрдө.

Дария Борисова, "Алаас-ас" ТХПК лабораана: «Пахта арахсар, онтун сүөкүүбүт. Нормализация буоларын курдук кыратык пахтаттан кутан эргитэбит биир маасса буолуор диэри».

Күн бүгүн Алаас астар минньигэс арыыны кытары, чөчөгөй оҥорон таһаараллар. Инникки былааннар киэҥ. Бородууксуйа көрүҥүн элбэтэр соруктаахтар.

Салгыы Хорообуттан суруналыыстар десааннара Чүүйэ диэки туруналлар. Манна эмиэ улууска биир тарбахха баттанар хаһаайыстыбата үлэлиир.

Манна миниистир Артем Александров бэйэтэ тыраахтар уруулугар олорон, хороҕор муостаахтары аһатта. Чүүйэлэр хайдах үлэлии олороллорун илэ хараҕынан, инчэҕэй этинэн биллэ. Маныаха тыа хаһаайыстыбатын иһиттэн көрдөрөр-иһитиннэрэр эйгэ үлэһиттэригэр сырдатта.

Артем Александров, СӨ тыа хаһаайыстыбатын миниистирэ: «Үлэлии сылдьар дьоннор тылларын-өстөрүн иһиттигит. Бүгүҥҥү күҥҥэ биһиги тыйыс усулуобуйабытыгар хайдахтаах даҕаны балаһыанньаҕа тыа сиригэр үлэ күөстүү оргуйар, дьон үлэлиир-хамныыр. Онон үптэнэр-хамнастанар, остуолугар аһыыр аһа баар. Уопсайынан, өрөспүүбүлүкэ үрдүгэр тэриллиилээх хаһаайыстыбалар баар буоланнар продовольственнай безопасноска үлэ-хамнас салҕанар».

Бу күн маны таһынан халыҥ хамаанда саҕалааччы фермер Масаха Мэхээс, аныгы хотонугар ыалдьыттаата. Итиэннэ Мэҥэлэр эмиэ биир тумус туттар уолларыгар, сыспай сиэллээҕи тутар Аркадий Лукин сылгы баазатыгар ыалдьыттаатылар. Тэрээһин үрдук таһымҥа ааста. Өссө даҕаны бу курдук, пресс-туур ыытыллара былааннана.