Дьокуускайга арендаҕа анаммыт бастакы элбэх кыбартыыралаах дьиэлэр тутулла тураллар

Билибин уулуссатын саҥатыгар саҥа дьиэлэр тутуулара көхтөөхтүк барар. Балартан биирдэстэрэ - "Уһук Илин уокурукка удамыр сыаналаах арендалыыр дьиэ" диэн саҥа бырагырааманан тутуллар дьиэ буолар. Тутуу үлэтэ ааспыт сыл атырдьах ыйыттан саҕаламмыта. Билигин 30 тутааччы тымныыны-тымныы дьиэбэккэ күннэтэ түбүгүрэр.

Иван Кычкин, тутуу биригэдьиирэ: «Билигин бетоммутун кутуута саҕаланна. Кыһыҥҥы технологияннан сылытыылаах буолар».

"Удамыр сыаналаах арендалыыр дьиэ" саҥа бырайыак ааспыт сылга олоххо киирбитэ. Бырагыраама чэрчитинэн Саха сирин 4 куоратыгар, Дьокуускайга, Нерюнгрига, Миринэйгэ, Алдаҥҥа уопсайа биир тыһыынчаттан тахса кыбартыыраны тутан 2026 сыл бүтүөр диэри үлэҕэ киллэрэр сорук турар. Холобура бу тутулла турар дьиэ 400-тэн тахса кыбартыыралаах, барыта арендаҕа бэриллиэҕэ.

Архип Афанасьев, тутар тэрилтэ үлэһитэ: «454 кыбартыыра буолар. Сылаас массыына уурар сирдээх буолар, ол үрдүгэр оҕо оонньуур сирдээх буолар. Этээһэ 16-ҕа дылы буолар».

Бу кыбартыыралары туһааннах категория эрэ дьон куортамыныыр кыахтаах. Манна олорорго хабыллыбыт дьон аренда рыноктааҕы орто сыанатын сорҕотун эрэ төлүөҕэ. Холобура икки хостоох кыбартыыра иһин быһа холуйан 12 тыһыынчаҕа диэри төлүөҕэ.

Мария Алексеева, СӨ олох-дьаһах программаларын сайдыытын киинин дириэктэрэ: «Бастатан туран СВОҕа кыттыбыт дьоннор, кинилэр дьиэ кэргэттэрэ. Уонна атын сиртэн кэлбит исписэлиистэр».

Бу категорияҕа хапсар дьон сайабыланньаларын тутуу министиэристибэтигэр олох-дьаһах бырагыраамаларын сайдыытын киинигэр туттарыахтарын сөп. Бүгүҥҥү күҥҥэ,арендаҕа 24 квартира бэлэм, онно дьон номнуо олорор. Оттон бу Сосновый бор олорор комплекс эһиил тутуллан бүтүөхтээх.

Билибин уулуусатыгар бу дьиэни тэҥэ өссө биир дьиэ арендаҕа диэн тутуллан бүтэн эрэр. 141 кыбартыыралаах. Билигин ититэр системаны таҥыы үлэтэ бара турар.

Александр Ховров, тутар хампаанньа сүрүн инженерэ: «Гаас ситимин тарда сылдьабыт. Вентиляция оҥоһулла турар, ис-тас уонна хомунуу үлэтэ барар турар. Сүрүн үлэтэ олунньу ыйтан саҕаланар».

Дьиэ бу сыл бүтүүтэ тутуллан түмүктэниэхтээх. Этиллибитин курдук квартиралар толору ремоннаах, сүрүн миэбэлинэн хааччыллыбыт буолуохтара.