Тулагы - Киллэм нэһилиэгэр бэйэ халбаһыта

Үс көрүҥ аналлаах туус кутуллан, илиинэн мэһийии саҕаланар. Тулагы-Киллэм нэһилиэгин Сыырдааҕын олохтооҕо, элбэх оҕолоох ийэ Анна Сыроватская ааспыт сылтан саҕалаан, бэйэ бородууксуйатын оҥорон саҕалаата. Устар бөлөх иннигэр кини бэйэтин хопчуонай халбаһыытын оҥоруутун кистэлэҥин көрдөрдө.

Анна Сыроватская, Тулагы-Киллэм нэһилиэгин олохтооҕо: «Тума кутан баран мэһийэбит. Нитритнай туус диэни туттабын. Бу бактерия, ботулизм үөскээбэтин диэн».

Киһи быар куустан олордоҕуна  биллэн туран тугу да ситиспэт. Анна бэйэтэ үөрэммит, оборуудабанньатын сакаастаабыт. Кини халбаһы оҥоһуллан тахсар технологиятын билигин баһылыырын кэпсиир. Дьиэ далбар хотуна сып-сап туттан, аны бородууксуйа бэлэм буоларыгар 2-ис түһүмэххэ киирэр.

Анна Сыроватская, Тулагы-Киллэм нэһилиэгин олохтооҕо: «Халбаһы хаҕа атыыланар. Ону бастаан инчэтэбит».

Саамай эппиэтинэстээх түһүмэх саҕаланар. Манна бэлэмнэниллибит фарш салгына суох хаҕыгар киириэхтээх. Мэһиллибит эти хаста да төхтүрүйэн анньан, эппит халбаһы омоонун ылар. Салгыы  саамай сүрүн түһүмэх.

Анна Сыроватская, Тулагы-Киллэм нэһилиэгин олохтооҕо: «Ыыһыыр тэрилбитигэр мас сыыһын кутабыт. Онтон арыыта түһэр иһитин кэтэрдэбит. Итиэннэ халбаһыбытын ыыһыыр иһиккэ ыйыыбыт».

Бэлэм хахха киирбит мэһиллибит эппит, оборуудабанньаҕа киирэр. Оттон манна чопчулаан этэр буоллахха, Сыроватскайдар дьиэ кэргэн 3 оҕолоохтор. Элбэх оҕолоох ыал билигин халбаһы атыыласпат буолбут, маныаха Анна бэйэтин бородууксуйатын атыыга кыралааһан таһааран эрэр.

Анна Сыроватская, Тулагы-Киллэм нэһилиэгин олохтооҕо: «Сойутабыт. Кыраадыһын 40 диэри түһэрэбит. Онтон тура түспүтүн кэннэ ылабыт».

1,5-2 чаас бириэмэнэн бородууксуйа бэлэм буолар. Сип-сибиэһэй хопчуонай халбаһы сыта куукунаны толорор.

Кыраттан саҕалаан, улахан бэйэ сыаҕын арынарга  сыалланан Анна Сыроватская инники былаанын торумнуур. Үлэтин былаанныыр.