Саха сиригэр дьаҥ ыарыыта элбиир

Дьокуускай балыыһаларыгар киһи кэлиитэ элбээн уочарат уһуур. Дьокуускай олоохтоҕо Клара Туласынова сөтөлө өр ааспакка эрэйдээн, балыыһаҕа көрдөрүнэ кэлбит. Дьаҥ ыарыыта элбээн турарынан, балыыһаҕа кэлэрбин тохтото сылдьан уһаан хаалбытын этэр.

Клара Туласынова, Дьокуускай олохтооҕо: "Үһүс нэдиэлэтин сөтөлүм ааспат. Бэйэм хронисечкай бронхиттаахпын. Бу билигин ковид ыарыыга анализ ылбыттара, суох эбит. Тыҥам ыраас. Онон көннөрү бэргээбит диэтилэр". 

Быраастар этэллэринэн үгүс дьон ыалдьан баран кэмигэр кэлбэккэ бэйэтэ эмтиэкэлэнэр, онон ыарыытын тарҕатан, уһатан кэбиһэр.

Савелий Неустроев, СӨ 3№-дээх балыыһатын фельдшера: "Сөтөллөр, температуралыыр буоллахха бырааска кэлэр ордук. Манна грипп ыарыытыгар уонна ковидка анализ ылабыт. Дьиэҕэ бэйэ эмтэнэр наадата суох". 

Ааспыт нэдиэлэттэн Саха сиригэр ОРВИ, грипп ыарыыта биллэ эбилиннэ. Улахан дьон уонна оҕолор ордук ыалдьаллар. Өрөспүүбүлүкэтээҕи 3-№-дээх  балыыһаҕа күннэтэ ортотунан биир бырааска 25-30 киһи сылдьар.

Савелий Неустроев, СӨ 3№-дээх балыыһатын фельдшера: "ОРВИ көрдөрүүтэ билигин үрдээн турар. Ковид биирдиилээн баар. Грипп эмиэ оннук. Үксүн ОРВИ буолан, бронхиттара бэргээн кэлэллэр. Дэҥҥэ ойоҕостотууну баалаппыт дьон баар буолаллар".

Саха сиригэр тохсунньу саҥатыттан дьаҥынан ыалдьыы көрдөрүүтэ үрдүк. Ол курдук тыһыынчанан киһи ОРВИ, грипп ыарыынан ыарыйда. Короновирус эмиэ тарҕанан турар. Орто уонна аҕам саастаахтары тэҥэ ордук оскуола, уһуйаан саастаах оҕолор ыалдьыылара эмиэ элбэх.Биллэрин курдук, ыарыыны сэрэппит ордук, онон исписэлиистэр харыстанарга сүбэлииллэр. Маныаха масканы кэтэр кедьүүстээҕин ыйаллар. Он тэҥэ болҕомтону тус гигиенанаҕа, иҥэмтиэлээх аска-үөлгэ, битэмииннэргэ уурар наадалаах.

Елизавета Яковлева, Роспотребнадзор Саха сиринээҕи салалтатын эксперт-исписэлииһэ: "Дьон элбэхтик мустар сиригэр, ол эбэтэр атыы-эргиэн кииннэригэр, оптуобуска, мааската кэтэ сылдьыҥ. Улахан наадата суох буоллаххытына сылдьаргытын туттунуҥ. Илиигитин наар кичэйэн суунуҥ. Ыалдьаары гыммыт буоллаххытынан бэйэ эмтэниинэн дьарыгырымаҥ, бырааска көрдөрүнүҥ". 

Исписэлиистэр бэлиэтииллэринэн, ОРВИ, грипп ыарыыттан харыстаныыга саамай көдьүүстээҕинэн быһыы ылыы буолар. Бүгүҥҥү күҥҥэ өрөспүүбүлүкэ үрдүнэн 4 сүүстэн тахса тыһыынча киһи грипп утары вакцинаны ылбыт. Быһыыны ким баҕалаах поликлиникаларга кэлэн ылыан сеп.