"Өлөөһө аҕа ууһа аныгы кэмҥэ: өбүгэ ситимэ" — форум аан маҥнайгытын ыытылынна

Алгыс баһа сыаланан, Россияҕа Дьиэ кэргэн, Саха сиригэр Оҕо сылын түмүктүүр  "Өлөөһө аҕа ууһа аныгы кэмҥэ: өбүгэ ситимэ" диэн ааттаах форум арыллар. Бүгүн Өксөкүлээх Өлөксөй аатын сүгэр уораҕайга улуу киһибит бэйэтин аймах-билэ дьонноро муһуннуллар. 

Саала иһэ тобус-толору киһи. Оттон бу барыта хаан уруу аймахтар, чугас дьон олороллор. Кинилэр бары биир өбүгэттэн удьуорданан тахсыбыт дьон буолаллар. 1771 сыллаахха төрөөбүт  Алексей Собакин саҕаттан күн бүгүнүгэр диэри өбүгэ ситимэ быстыбат сыаллаах бу тэрээһин ыытыллынна. Бу халыҥ аймах хас да аҕа уустарынан арахсар эбит. Өлөөһөлөр бэйэлэрэ, Куонааскы, Михаил, Сааба уонна Тэрээки аҕа уустара.

Гаврил Огонёров, Тэрээки аҕа ууһун сыдьаана: "Төрүччүбүтүн Иннокентий Сергеевич сурукка хаалларбыт эбит. Ону биһиги буламмыт 1990 сыллаахтан ыла үлэлэһэбит".

Ити курдук 90 сыллартан биирдиилээн аҕа уустара төрүччүлэрин үөрэтэн баран, бу билигин бүтүн култуура киинин ылар, Саха сиригэр аан бастакы аймахтар бэйэлэрэ тэрийбит форумнара ыытыллынна.

Манна даҕатан этэр буоллахха, Өлөөһөлөр хайа да өттүттэн талааннаах дьоннор. Аймахтарга сорсуннаах улуу булчуттар, норуот хаһаайыстыбатын туруу үлэһиттэрэ, спортсменнар, уус тыллаах, айар талааннаахтар бааллар. Онтон биирдэстрэ суруйааччы, бэйиэт Ольга Корякина - Умсуура.

Ольга Корякина -Умсуура, Михаил Собакин аҕа ууһун сыдьаана: "Мин аҕа ууспун билбэппин. Тоҕо диэтэр ийэм төгүрүк тулаайах. 2-3 ый анараа өттүгэр биһиги Собакиттар аймах буоларбыт архыыпка көһүннэ".

Ольга Николаевна курдук соторутааҕыта өбүгэлэрин билбит дьон манна үгүс эбит. Онон бу күн билсиһии, историяны сэгэтэн көрүү буолла. Холобур, өрөспүүбүлүкэбит биир чаҕылхай спортсмена, Дыгын оонньуутун кыттыылааҕа Николай Матаннанов  Өлөөһөлөр сыдьааннара.

Николай Матаннанов, Сааба аҕа ууһун сыдьаана: "Өлөөһөлөр аймахха киирсэбит. Мин хос эһэм Томойо Сэмэн буолар. Форумҥа олус элбэх аймах кэлбит. Онон саҥа билсиһиилэр күүтэллэр".

Өлөөһө аҕа ууһун биир чаҕылхай ыччата айар тыл аҕата, саха литературатын төрүттээччи Өксөкүлээх Өлөксөй  Өлөөһө сиэнэ. Онон Сахатын норуотун туһугар алгыстаах аартыга Өлөөһө аҕа ууһуттан утумнанар. Оттон маннык тэрээһин үгэскэ кубулуйан өссө да ыытылла туруоҕа.