Таатта улууһун бастакы кулубатыгар анаммыт түмэл

Дьиэ иһигэр бэйэ түмэлэ. Үгүс киһиэхэ кыаллыбат хайысха. Ол эрэн, үйэ тухары дьиэ кэргэҥҥэ күндү мал-сал хараллан сытарын туһаҕа таһаарыы, дьоҥҥо-сэргэҕэ көрдөрүү, ыал буолуу сыаннаһын тарҕатыыга сүҥкэн суолталанарын өйдөөтөххө, дэбигэс. Леонид Павлович Романов Дьокуускай куорат олохтооҕо. Кини Иван Елисеевич Кулаковскай - Оонньуулаах Уйбаан сыдьаана. Биирдэ эмискэ кэлбит санааттан, баҕа санаа туолуута саҕаланар. 

Леонид Романов, Оонньуулаах Уйбаан сыдьаана: "Музей тутуохха наада дьонум туһугар диэн. Тоҕо диэн буолла. Онуоха Иван Елисеевич Кулаковскай - Оонньуулаах Уйбаан аата тиллибитэ. Дьэ, манна эдьиийим Людмила Реасовна улахан өҥөлөөх диэххэ".

Аймах-билэ дьон өйөбүлүнэн, үгүс киһи сүбэтинэн Леонид Павлович олорор дьиэтин биир этээһин бүтүннүү дьиэ кэргэн түмэлигэр аныыр. Онно сүрүн миэстэни Иван Елисеевич Кулаковскай ылар.

"Оонньуулаах Уйбаан Таатта улууһун бастакы кулубата буолар. Кини үс сыл салайааччынан олорбута. Бу кэм иһигэр Таатта улууһугар хас даҕаны суолталаах социальнай эбийиэк олоххо киирбитэ. Маны таһынан Былатыан Ойуунускайы үөрэнэ сырыттаҕына, бэйэтэ таба көрөн, стипендия анаттарбыта", - Алена Анисимова, корреспондент.

Бу түмэлгэ Былатыан Ойуунускай эмиэ ахтыллар. Оччотооҕу кэмҥэ кини Кулаковскайдары, Собакиннары кытта ыкса ситимнээҕэ. Биир өбүгэлээх Өлөөһө аҕа ууһун сыдьааннарыгар кини элбэхтэ хонон-өрөөн ааһара, сибээс тутара.

Леонид Романов, Оонньуулаах Уйбаан сыдьаана: "Оонньуулаах Уйбаан суоҕа буоллар Өксөкүлээх да суох буолуоҕа этэ. Бу барыта бэйэбит дьоммутугар сыппыта, барыта хайдах эрэ кистэлэҥ этэ. Ол иһин улаханнык киэҥ эйгэҕэ тарҕаныан баҕарбатаҕым, ол эрэн аймахтар бары сырыттылар.

Манна хас биир муннук суолталаах, дириҥ ис хоһоонноох. Түмэл хаһаайына төһө да дьон болҕомтотун сөбүлээбэтэр, кэлбит киһиэхэ аана аһаҕас. Ыалдьыттары буруо таһааран, алҕаан көрсөр.

Ефросинья Иванова, ыалдьыт: «Урут дьонноро туттубут маллара-саллара баарын бэйэм илэ харахпынан көрөн сөхтүм. Маннык экспонаттары биһиги урут музейга эрэ көрөр буоллахпыт дии

Аймахтарыттан хаалбыт малы-салы таһынан, экспонаттарын Леонид Павлович бэйэтэ эмиэ көрдөөн булбут. Кини инникитин "Саха саарыннара" диэн өрөспүүбүлүкэҕэ бөдөҥ түмэл тутуллуон ыра санаалаах. Онуоха бастакы хардыы оҥоһуллубут. Норуот ырыаһытыгар, Таатта улууһун бастакы кулубатыгар Иван Елисеевич Кулаковскайга - Оонньуулаах Уйбааҥҥа анаммыт түмэл-дьиэ баар буолбута туоһулуур.