Кыайыы 80 сылын көрсө сэрии оҕолоругар кинигэ бэлэмэнэр

Уус Алдан улууһуттан төрүттээх  Зинаида Винокурова  Дьокуускайга олорор Сэрии оҕолорун сүбэтин бэрэссэдээтэлинэн 25 сыл устата үлэлээн кэллэ. Олоххо, общественнай үлэҕэ өрүү көхтөөх позициялаах, оччотооҕу партия тутаах үлэһитэ, билигин төһө даҕаны 84 сааһыгар үктэннэр урукку тэтимин ыһыктыбат. Ол курдук кини Саха сиригэр сэрии оҕолоро социальнай өйөбүлүнэн хааччыллаларыгар тустаах сокуоннар олоххо киирэллэрин ситиспит өҥөлөөх.

Зинаида Винокурова, Дьокуускайдааҕы сэрии оҕолорун общественнай тэрилтэ сүбэтин бэрэссэдээтэлэ: "Коммунальнай өҥөҕө уонна биирдии тыһыынча эбии төлөбүр, итини  сэргэ санаторийга эмтэнээһин баар. Билигин тиис оҥоруутун туруорса сылдьабыт уонна тыыл бэтэрээннэригэр курдук эмкэ рецепт баар буолуон баҕарабыт". 

Бүгүҥҥү күҥҥэ Дьокуускай үрдүнэн 4784 сэрии оҕото баар, өрөспүүбүлүкэ үрдүнэн 10-тан тахса тыһыынча киһи бу категорияҕа киирсэр. Ол курдук 1927 сылтан 1945 сыл ахсынньы 31 диэри төрөөбүт дьон сэрии оҕолоро дастабырыанньалаахтар. Зинаида Дмитриевна сэрии кэминээҕи оҕолор ахтыыларын  түмэн,  кинигэ, ыстатыйа таһааттарыынан ылсан дьарыктанар. 

Зинаида Винокурова, Дьокуускайдааҕы сэрии оҕолорун общественнай тэрилтэ сүбэтин бэрэссэдээтэлэ: "Кыайыы 75 сылыгар икки кинигэ таһаарбыппыт. Ол кэннэ социальнай өбөбүл туһунан үгүс ыстатыйаны таһаарбыппыт. Ол туһунан хомуурунньук таһаарбытым". 

Ол хомуурунньук 80 сыллаах Улуу Кыайыы үбүлүөйүн көрсө номнуо 10-с кинигэ буолан бэчээттэнниэхтээх. Үбүлээһинин куорат баһылыгын граныгар киирсэн ситиһэр соруктаахтар. 

Зинаида Винокурова, Дьокуускайдааҕы сэрии оҕолорун общественнай тэрилтэ сүбэтин бэрэссэдээтэлэ: "Кинигэбит бүтэн эрэр. Билигин бу мунньахтан кэллим ол дьыалатынан. Онно 320 тыһыынча солкуобай наада. Ону куорат баһылыгын граныгар киллэрин диэн көрдөстүбүт". 

Зинаида Дмитриевна бэйэтэ сэрии оҕото, аҕата сэриигэ аттанарыгар кыһыл оҕо этэ.Оттон быйылгы үбүлүөйдээх сылы ытык кырдьаҕас үйэлээх  үлэ үөһүгэр сылдьан көрсөр.