Тыа хаһаайыстыбатын министиэристибэтэ бастыҥ аграрийдары кытта көрүстэ

Саха сиригэр ыһыы кээмэйин 2030 сылга диэри 70 тыһыынча гектарга тириэрдии. Инники сылларга үлэ сүрүн соругун  миниистири солбуйааччы Сахаяна Павлова мунньах кыттыылаахтарыгар иһитиннэрэр. Ол аата аграрийдар биэс сыл иһигэр 20 тыһыынча гектарынан элбэҕи олордуохтаахтар. Маныаха бастыҥ хаһаайыстыбалар, учуонайдар, сири таҥастааһыҥҥа сыһыаннаах бары тэрилтэлэр үлэ инники былаанын торумнаары түмүстүлэр. Биллэн турар, бастатан туран үтүө холобурдары иһиттилэр. Ньурба улууһугар ходуһаны тупсарыыны ылсыбыттар.

Егор Филиппов, Ньурба улууһун сүрүн агронома: «Ходуһаны, айылҕа эрэ биэрбитин буолабакка. Билигин бэйэбит үүнүүтүн, урожайын улаатыннараарыбыт үлэлиибит. Ходуһаларга подсев ыһыытынан ыспыппыт».

Оттон хайа баҕар саҥа сүүрээн билимҥэ олоҕурар. Саха сиригэр ылбычча сиэмэ тыллыбат. Онон олохтоох учуонайдар айан таһаарбыт суортара эрэ үрдүк үүнүүнү биэрэр. Маныаха олордооччуну билими кытта сибээстээччи туһааннаах министиэристибэ. 

Елена Пестерева, СӨ ТХНЧИ сүөһү аһылыгын оҥорор уонна отонноох култуура лабораториятын сэбиэдиссэйэ: «Тыа хаһаайыстыбатын министиэристибэтэ сорудах биэрэн биһиги Чурапчы, Таатта, Нам улуустарыттан Ньурбаҕа, Сунтаарга тиийэ үлэлэһэ сылдьабыт».

Онон ыһыыга быйылгыттан саҕалаан хамсааһын тахсыахтааҕын ыйдылар. Маныаха  агрокартаны сыыппараҕа киллэрии курдук үлэлэр тэҥинэн барыахтара. Итини сэргэ ыһыы үлэтигэр дроннары туһаныы бу сылтан олоххо киириэ.

Сахаяна Павлова, СӨ Тыа хаһаайыстыбатын миниистирин солбуйааччы: «Быйыл 4 агродрон кэлиэхтээх. Биир учебнай буолуо. Маны кытта тэҥҥэ олоххо киллэрии үлэтэ ыытыллыаҕа».

Күн бүгүн Саха сирэ этинэн 27%,  онтон үүтүнэн 55%, хортуосканан 62 бырыһыан, оҕуруот аһынан 37 бырыһыан хааччынан олорор. Бу көрдөрүү аны биэс сылынан 1.5 төгүл үрдүөхтээх. Соругу ситиһиигэ сүөһү аһын хааччыйыы, ол эбэтэр эбии аһылыгы оҥоруу сүрүн тирэх буолар. Уус Алдан улууһа олохтоох сиэмэттэн комбикорм оҥоруутун саҕалаата.

Прокопий Белолюбский, Уус Алдан улууһун сүрүн агронома: «Былырыын комбикорм собуотун атыылаһаммыт быйыл үлэҕэ киллэрдибит. Билиҥҥи туругунан 50 туонна оҥорон нэһилиэнньэҕэ атыылыы олоробут».

Мунньах иккис күнүгэр улуустарга бэриллибит боломуочуйаларга уларыйыы тула кэпсэтиэхтэрэ. Сүрүннээн үбүлээһин боппуростарыгар тохтуохтара.