Дьокуускайга аан дойду үрдүнэн саамай тымныыга ыытыллар пленэр буолла

Кириһиэнньэ тымныыларын ахсарбакка "50 кыраадыс тымныыга пленэр" диэн ааттаах бырайыакка Гаврил Шелковников Уус-Алдантан анаан -минээн кэлбит. Таһырдьа тымныыга хартыынаны аан бастакытын уруһуйдуур буолан, халыҥ таҥаһын кэтэн кэлбит.

Гаврил Шелковников, "Пленэр - 50" бырайыак кыттыылааҕа: «Тымныы эрээри, сэрэйэн халыҥ таҥас кэтэн кэлбитим».

Тымныы хаһаайына - Чысхаан бу күн, күн -дьыл туругуттан куттаммакка кэлбит худуоһунньуктары уруйдаан-айхаллаан, алгыс тылын этэр. Уонна биллэн туран кыттааччыларга тулууру баҕарда. Тоҕо диэтэр,  бырайыагы сэҥээрэн кэлбит дьон аны 2 чаас устата таһырдьа туран уруһуйдуохтара.

Чахчы,  быйыл ааспыт тэрээһиннэҕэр күн-дьыл тымныы диэн тэрийээччилэр эмиэ тоһоҕолоон этэллэр. Кырааска түргэнник тоҥор, онон худуоһунньуктарга бу дьиҥнээх тургутуу тэҥэ. Маныаха сүҥкэн уопут буолар диэн Дьокуускай куорат устун интириэһинэй экскурсиялары ыытар, бүгүҥҥү бырайыак кыттыылааҕа Юлиана Алексеева санаатын үллэстэр.

Юлиана Алексеева, "Пленэр - 50" бырайыак кыттыылааҕа: «Боруобалыахха наада эбит дии санаабытым. Хайдах биһи уруһуйдьуттарбыт кыһыҥҥы хартыыналары уруһуйдуулларый диэн интириэһиргээбитим».

Быйылгы тэрээһиҥҥэ сааһыттан тутулуга суох, эдэрдиин эмэнньиин бары кытынныллар. Оттон пленэр Саха сиригэр 6 төгүлүн ыытыллар, сыллата уруһуйдуур миэстэ уларыйан иһэр.

Наталья Христофорова, "Пленэр - 50" бырайыак тэрийээччитэ: «Сүрүн оруола томороон тымныыга уруһуйдуубут диэн буолбатах. Бу пленэр таһырдьа тахсан уруһуйдааһын уонна кыһыммыт уһун баҕайы, ону киэргэтэ таарыйа, кэрэни кэрэхсии, бэйэ бэйэбитин кытта билсэ диэбит курдук мустабыт».

Алтыс төгүлүн ыытыллыбыт пленэргэ кыттааччылар бары санаалара өрө көтөҕүллэн, хайдахтаах курдук тулуурадахтарын билэн, астынан-дуоһуйан, итии чэй иһэн баран, тарҕастылар.