Олохтоох үүт собуота оҥорон таһаарыытын элбэтиигэ сорук туруорар

Бастаан минньигэс барыанньата түһэр ол кэннэ үрдүгэр йогурт кутуллар. Конвейер устун айанныыр уһун субуу барыта биир биир хаппахтанар, туһааннаах марка сыһыарыллар. Атыылаһааччы долбууругар биирдиилээн иһиттэрбит бастаан оҥоһуллаларыгар сыстыһа сылдьаллар.

Үүт собуота оҥорон таһаарыытын элбэтиигэ туһулаан үлэлиир. Ол курдук ааспыт сылга 8100 туонна пастеризацияламмыт үүтү, итини сэргэ 2600 туонна үрүҥ аһы нэһилиэнньэҕэ атыыга таһаарбыт. Оттон быйылгы былаан былырыыҥҥыттан 10 бырыһыанынан үрдүк. Онон Саха сирин баараҕай собуотугар күҥҥэ хас эмэ уонунан туонна соҕотуопкаланар.

Татьяна Васильева, Дьокуускайдааҕы үүт собуотун маркетолога: «Күҥҥэ 46 туонна курдук үүтү переработкалаан таһаарабыт – ультрапастеризованнай диэн буолар. Уонна 12 туонна кисломолочка. Цельнай үүт 4-5 туонна кэриҥэ кэлэр».

Үүт собуота Дьокуускай куораты уонна чугас эргин улуустары үрүҥ аһынан хааччыйар. Тэрилтэ оҥорон таһаарыы кээмэйин улаатыннарыыны таһынан хаачыстыбаҕа сүрүн болҕомтону уурар. Бу оборуудабанньанан хааччыллыыттан улахан тутулуктаах.

Бэйэни хааччыныы көрдөрүүтүн улаатыннарыы дойду үрдүнэн турар сүрүн сорук. Күн бүгүн Саха сирэ үүтүнэн 55% хааччынан олорор. Маныаха Ил дархан Айсен Николаев 2030 сылга диэри олохтоох оҥорон таһаарыыны сайыннарыы туһунан стратегическай ыйааҕын олоххо киллэриигэ тыа хаһаайыстыбатын сорох боломуочуйаларын улуустарга биэрии сүрүн тирэх буолуохтаах.

Артем Александров, СӨ Тыа хаһаайыстыбатын миниистирэ: «Бу сокуон тыа хаһаайыстыбатын эйгэтигэр күүскэ үлэлиэҕэ диэн эрэнэбит. Оройуоннарга боломуочуйаны кэҥэтэр».

Быйыл тыа хаһаайыстыбатыгар олохтоох бюджеттан 15 миллиартан ордук үп көрүлүннэ. Улахан таһымнаах оҥорон таһаарар тэрилтэлэри сайыннарыыны, кэҥэтиини кытта, кыра кыамнатаах эбийиэктэри тутуу бу сылтан саҕаланыа.