Иван Гоголев - Кындыл төрөбүтэ 95 сылыгар анаммыт быыстапка аһылынна

Ойуунускай аатын сүгэр литература музейыгар улуу поэт, прозаик, драматург Иван Гоголев - Кындыл 95 сылыгар анаммыт быыстапкатыгар кини төрөөбүт улууһуттун Бүлүүттэн бүтүн делегция кэллэ. Чочу нэһилиэгиттэн кини музейыттан Иван Михайлович тус тутта сылдьыбыт ураты тэриллэрэ, мала-сала дьон дьүүлүгэр турда. Чочу түмэлэ суруйааччы аатын үйэтитиигэ,  үбүлүөйүгэр анаан ааспыт сылтан бэлэмнэнии тэрэһиннэри көхтөөхтүк ыытар. Ол курдук Хара кыталык айымньы дьоруойдарыгар анаммыт скульптура күрэҕин кыттыылаахтарын үлэлэрин бу быыстапкаҕа аҕалбыттар.

Мария Лыткина, Чочу нэһилиэгэр И.М.Гоголев-Кындыл музейын үлэһитэ: «Барыта 11 үлэ киирбитэ өрөспүүбүлүкэ араас муннугуттан. Маҥнайгы миэстэни ылбыт Иванов Афанасий Егорович, Бүлүү художественнай оскуола заведующайа. Бу үлэ өрөспүүбүлүкэҕэ Оҕо сылынан уонна Өҕо көмүскэлин күнүгэр анаан музей тиэргэнигэр улахан скульптура буолан турар».

Быыстапкаҕа Кындыл айымньыларын суруйбут бөрүөлэрин, бэччээттиир массыынкатын, айанныырыгар арахсыбат чемонданын көүөххэ сөп. Суруйаччы кыыһа Лена Гоголева - саха театырын сүрүн худуоһунньуга быыстапка экспонаттарын, аҕатын туһунан бэрт истиҥ ахтыыны оҥордо. Саха норуодунай поэта Иван Михайлович Гоголев - Кындыл Бүлүү куоракка күн сирин көрбүтэ. Кини оҕо сааһа Чочу диэн сиргэ ааспыта. Улаатан, ыал буолан баран Хаҥалас улууһун киинигэр Покровскайга олохсуйбута.

Лена Гоголева, И.М.Гоголев-Кындыл кыыһа, Саха театырын сүрүн худуоһунньуга: «Каждый вечер он отправлялся в тайгу гулять с любимыми собаками. Из тайги привозил зачастую очень интересные вещи. Например, диковинные коренья, ветви. Из них сам мастерил каких-нибудь мистических существ из якутской мифологии, которая прекрасно описана в его произведениях».

Кындыл биир саамай биллибит-көстүбүт айымньытынан этиллибитин курдук "Хара кыталык" буолар. Бу роман-трилогияҕа саха киһитэ омук быһыытынан ураты майгылааҕын уустаан-ураннаан толору арыйан көрдөрбүтэ.

Галина Алексеева, Чочу нэһилиэгэр И.М.Гоголев-Кындыл музейын дириэктэрэ: «Бу панно “Хара кыталык”. Биһиги нэһилиэкпит далбардара “Утум” түмсүү салайааччыта – Зинаида Егоровна Петрова. Кылынан сиэлинэн оҥорбута».

Иван Гоголев - Кындыл үбүлүөйдээх 95 сылын быйыл үрдүк таһымнаахтык бэлиэтиир сорук турар. Сыл устата улуустарга тэрээһиннэр, оскуолаларга күрэхтэр, быыстапкалар ыытыллыахтара.

Пётр Догоюсов, Бүлүү улууһун Чочу нэһилиэгин баһылыга: «Былаан быһыытынан араас куонкурустар буолуохтаахтар. Бэйэбит баҕабытынан мас уустарыгар күрэх ыытаары гынабыт».

Поэт олоххо тардыһыыта, киһиэхэ, төрөөбүт сиргэ таптала, айылҕаҕа сыһыана, олох кэрэтин көрүүтэ, хас биирдии түгэни сыаналыыра барыта айымньыларыгар көстөр. Кини баай уус-уран нэһилиэстибэтэ көлүөнэттэн көлүөнэҕэ бэриллэн үйэлэргэ хаалыаҕа.