Дьокуускайга Амма улууһун күнэ ыытыллынна

Үгэс быһыытынан Амма улууһун күнэ тохсунньу ыйга ыытыллар, манна сыл түмүгүн таһаараллар итиэннэ Дьокуускай куоракка олохсуйан олорор биир дойдулаахтарыгар уонна ыалдьыттарга интэриэһинэй тэрээһини ыыталлар.

Юрий Борисов "Баһырҕастаах аттаах Баабый Баатыр" олоҥхотугар олоҕуран турбут испэктээкили көрдөрдүлэр. Бу олоҥхо испиктээкили "Сир симэҕэ" Арассыйа көрдөрүүлээх ансаамбылын иитиллээччилэрэ толорон, кэлбит дьон биһирэбилин, сэҥээритин ыллылар.

Былырыын Амма улууһугар Олоҥхо сыла биллэриллибитэ.  Биир дойдулаахтар бары түмсэн, көхтөөхтүк кыттан сылы - үрдүк таһымнаахтык, киэҥник бэлиэтээтилэр.

Иван Иванов, Амма улууһун култуура салаатын салайааччыта: «Аммаларбыт куруутун күүтэллэр, наар кэлэн көхтөөхтүк кытталлар. 2024 сыл Аммаҕа Олоҥхо сыла түмүктэннэ, ол чэрчитинэн араас хабааннаах тэрээһин бөҕөтө ыытылынна уонна 17 төгүлүн ыытыллар Олоҥхо ыһыаҕа буолан ааста».

Сыл түмүктүүр тэрээһинигэр дьон-сэргэ дойду амтаннаан аһын-үөлүн ылар. Бу күн атыы-тутуу, норуот маастардарын, урбаанньыттар быыстапката үлэлээтэ.

Степан Кузьмин, Амма улууһун баһылыга: «Бу күн чэрчитинэн хара сарсыардаттан араас таһымнаах тэрээһиннэр аастылар. Аммалар оҥорон таһаарар бородууксуйаларбытын аҕаламмыт атыылаатыбыт. Манна киирбит үп-харчы барыта анал дьайыы сиригэр сылдьар бэйэбит биир дойдулаахтарбытыгар тиийиэхтээх».

Кырдьык да, сыл иһигэр элбэх үлэ ыытыллынна. Тутуу, саҥардыы өттүнэн саҥа сынньананар паарка, оонньуур уонна спортивнай былаһааккалар тутуллан киирдилэр.  Маны тэҥэ киин нэһилиэккэ суол саҥардыллынна, элбэх ыал итии ситимҥэ холбонно.

Михаил Артемьев, Амма нэһилиэгин баһылыга: «Уоппутун барытын энергосберегающайга көһөрдүбүт. Маны таһынан Кеша Алексеев аатынан суолбут бетоннааһына саҕаланна. 7 км. суол оҥоһулунна, быйыл эмиэ оччо курдук суол киириэхтээх. Быйыл Амма киинигэр улахан поликлиника уонна лицей киириэхтээх».

Манан үлэ тохтообот. Быйыл Саха сиригэр Ийэ дойдуну көмүскээччи сылынан уонна Улуу Кыайыы 80 сылын көрсө, элбэх үлэ ыытыллыахтаах. Онон билиҥҥиттэн Амма дьоно түмсэн, быйылгы сылы үрдүк таһымҥа ыытарга бэлэмнэнэр.