"Мобильнай быраастар" бырайыак өрөспүүбүлүкэ ыраах сытар суола-ииһэ суох нэһилиэктэрин хабыа.

Ыраах хоту көтүөх иннинэ үлэ былаанын быһаарсыы биир тутаах түһүмэх. Ылбычча исписэлиис "Мобильнай быраастар" курдук уустук бырайыакка үлээбэт.  Бу сылга бастакы көтүү Өлөөн уонна Анаабыр улуустарыгар. Маныаха быйылгы былаан өссө кэҥээн биэрдэ.

Михаил Аммосов, СӨ нэһилиэнньэ доруобуйатын киинин  кылаабынай бырааһа: "Саха сиригэр баар хотугу улуустар нэһилиэктэрэ, ону таһынан ыраах суола-ииһэ суох нэһилиэктэри  барытын биһиги тэрилтэбитигэр биэрдилэр. Ол иһин 2025 сыллаах былааммыт олус улахан".

Саха сиригэр күн бүгүн бу бырайыагы олоххо киллэриигэ 6 улахан киһи, 2 оҕо, тиис уонна нарколог, психолог бөлөҕө үлэлиир. Манна туһааннаах сиргэ тиийии бэйэтэ туһунан уустук сорук. Кыһыҥҥы өттүгэр бураанынан айан, хоту халыҥ хаарын тибиитигэр буксуйуу. Бу барыта нэһилиэнньэ доруобуйатын чинчийиигэ анаан. Маныаха хас быыһаммыт олох өссө күүстээх үлэҕэ кынаттыыр. 

Изабелла Тихонова, Өрөспүүбүлүкэтээҕи быраастар мобильнай биригээдэлэрин сэбиэдиссэйэ: "Былырыын онкологияҕа сабаҕалаан сүүстэн тахса киһини эбии көрдөрүнүүгэ ыыттыбыт. Ол дьонтон 17 киһиэхэ искэҥ ыарыыта билиннэ. Ол дьон бары бастакы стадияҕа, ол эбэтэр эрдэ биллэн билигин доруобайдар".

Хоту уонна суола-ииһэ суох нэһилиэктэргэ исписэлиистэр, биллэн турар, тиийбэттэр. Холобур, эндокринолог курдук олус наадыйыллар быраас штата Арктика улуустарыттан аҥардас Үөһээ Халыма улууһугар эрэ баар. Оттон "Мобильнай быраастар" бырайыак икки сыл устата бу хайысханан былааннаах үлэни ыыппытын түмүгэр көрдөрүү тупсубут. 

Любовь Михайлова, эндокринолог быраас: "Биһиги көрбүппүт кэннэ, эмп ананан, саахардарын түһэрэн саҕалаан билигин көрдөрүүлэрэр үчүгэй. Салгыы көрдөрүнэргэ киин куоракка аныыбыт. Ону сорох дьон бырайыас ыараханыттан кыайан кэлбэт". 

Маны сэргэ уҥуох ыарыыта хоту ордук тарҕаммытын быраастар бэлиэтииллэр. Итини сэргэ, ханна баҕар буоларын курдук, сүрэх-тымыр бырааһыгар наадыйааччы үгүс.

Алена Крылатова, кардиолог быраас: "Сүрэх-тымыр ыарыытыгар 1773 киһи учуокка турар. Онтон ордук элбэх хааннарын баттааһына үрдүк дьон. Ааспыт сылга үрдүк таһымнаах эпэрээссийэни 23 киһи ааста".

Оттон быйыл быраастар арктика улуустарын сэргэ Алдан, Өймөкөөн, Үөһээ Бүлүү, Сунтаар, уус Алдан улуустарыгар сылдьыахтара.