Өрөспүүбүлүкэҕэ хаҥкылааһын көрүҥэ сайдар

Кырачаан Самаана чэпчэкитик туттан-хаптан эргийэр хамсаныыны оҥорор. Кини хаҥкыга аан бастакытын 3 сааһыгар турбут, билигин сэттэлээх кыыс номнуо бэйэтэ саҥа саҕалаан эрэр оҕолорго көмөлөһө сылдьар. Ийэлээх аҕата биир санаанан кыыстарын бу кэрэ спорт көрүҥүгэр биэрэргэ быһаарыммыттар.

Максим Андросов, төрөппүт: «Фигурнай катаниены талбыппыт. Онно отбор ааһаммыт дьарыктанан саҕалаабыппыт. Наһаа үчүгэй көрүҥ дии санаатыбыт. Маннык тымныы салгыҥҥа сылдьан киһи доруобуйата күүһүрэр эбит. Уонна хаҥкылааһын эккин сөпкө сайыннарар».

Кырдьык да бу көрүҥ киһи этин-сиинин бары өттүнэн сайыннарар. Көнөтүк тутта-хапта сылдьарга, маны тэҥэ тымныы салгын киһи иммунитетын бөҕөргөтөр. Оттон Самаана Андросова аҕата бэлиэтээбитин курдук, бу көрүҥ кыыс оҕоҕо ордук барсар. Ону тэрээһиҥҥэ мустубуттартан үгүстэрэ кыргыттар буолаллара туоһулуур. Маастар кылааһы юниордарга Саха сирин сүүмэрдэммит хамаандатын чилиэттэрэ көрдөрдүлэр.

Нарыйа Степанова, хаҥкынан фигурнай катаниеҕа юниордарга Саха сирин сүүмэрдэммит хамаандатын чилиэнэ: «Синхроннай катание диэҥҥэ баарбын. Москваҕа күрэхтэһиигэ бара сылдьыбытым. Олунньу ыйга эмиэ барыахтаахпын. Соҕотох хаҥкылыырдааҕар ыарахан курдук».

Синхроннай хаҥкылааһынынан Саха сирин спортсменнара ааспыт сылтан дьарыктанан саҕалаабыттар. Номнуо ситиһиилэр бааллар. Бу манна биир бырагырааманы тэҥинэн 5 киһи толорор. Онон кырдьык уустук хайысха буолар. Даҕатан эттэххэ, фигурнай катание өрөспүүбүлүкэҕэ дьэ сайдан эрэр. Манна олук саҥа катоктар арыллыылара буолар.

Елена Татаринова, СӨ хаҥкынан фигурнай катаниеҕа федерация бэрэссэдээтэлэ: «В связи со строительством новых объектов, конечно фигурное катание получило новый испульс к развитию. Сейчас активно развивается фигурное в поселке Чульман Нерюнгринского района, в городе Мирный, Удачный и в Якутске». 

Оттон киин куоракка сотору кэминэн саҥа хаҥкылыыр сир арылыннаҕына, фигуристар онно туспа бараннар дьарыктарын өссө сайыннарыахтара. Туһааннаах эбийиэк үлэҕэ киирдэҕинэ дьарыктанар киһи да ахсаана элбиэ турдаҕа.