Ил Дархан Дьокуускайга тутулла турар баараҕай эбийиэктэри кэрийэн көрдө

Олоҥхо уонна искусство киинин тутуу ис тутулун оҥоруу таһымыгар тиийбит. Ол курдук үлэһиттэр филармония саалатын механизмын таҥыыга сылдьаллар. Бу оркестры үөһэ аллара көтөҕүүгэ наадалаах сүрүн чаас. Уустук үлэни муус устарга түмүктүүр былааннаахтар. Ол  кэннэ сцена үүһээҥҥи өттүн оҥорууга киириэхтэрэ. 33 тыһыынча кыбадыраатынай миэтэрэ иэннээх баараҕай тутуу ситтэҕинэ-хоттоҕуна чугас эргин суох ураты киин буолуохтаах.

Афанасий Ноев, СӨ култуура уонна духуобунай сайдыы миниистирэ: «Дьону сомоҕолуур, түмэр киин буолуохтаах. Биһиги норуоттарбыт култуураларын, духуобунастарын көрдөрөр улахан киинэ буолуо диэн үлэлии сылдьабыт».

Күн бүгүн тутуу бэлэмэ 70 бырыһыаҥҥа тэҥ. Ититиитэ киирбит. Онон ис барааны оҥоруу тэтимнээхтик барар. Үлэ хаамыытын өрөспүүбүлүкэ баһылыга Айсен Николаев кэрийэн көрдө итиэннэ тутуу түмүктэнэр болдьоҕун эттэ.

Айсен Николаев, Ил Дархан: «Уверен, что этот объект будет сдан осенью. Торжественное открытие будет 7 сентября. Главное, чтобы работы проводились не только быстро, но и качественно. Требования наши очень высокие».

Дьокуускайга өссө биир улахан уонна суолталаах тутуу доруобуйаларыгар хааччахтаах оҕолорго үөрэх тэрилтэтэ. "Үөрэҕирии" национальнай бырайыаыган тутуллар эбийиэк Сэргэлээх суолугар урукку оҕо лааҕырын сиригэр дьэндэйэр. Кииҥҥэ оскуола, интэринээт уонна уһуйаан баар буолар.

Федор Попов, "Главстрой" тэрилтэ толорооччу дириэктэрэ: «Бүгүҥҥү күҥҥэ 130 киһи үлэлии сылдьар. Иккис блокка ититиибитин биэрдэхпитинэ дьоммутун эбэммит онно үлэлээн саҕалыахпыт. Интэринээккэ монолит үлэлэрэ бара турар, оҕо саадыгар сыбаайатын бүтэрдибит».

Эбийиэк турар сирэ сир хамсааһынын көрдөрүүтэ үрдүк буолан бөҕөргөтүүгэ улахан үлэ барбытын тутааччылар үллэстэллэр. Тутуу бырайыага ураты, типовой үөрэх тэрилтэлэриттэн чыҥха атын. Оҕо уратытыгар сөп түбэһиннэрэн былааннаммыт. Манна кылааска 12-лии оҕо үөрэниэ,  кинилэр үөрэх бырагырааматын таһынан олоххо бэлэмнээх тахсалларын ситиһээри араас идэҕэ уһуйар кылаастар баар буолуохтара.

Наталья Скрыбыкина, "Роскапстрой"  тэрилтэ бырайыактыыр салаатын салайааччы: «Манна ыраахтан сылдьар оҕолор олоруохтара. Оҕо саадыгар биир этээс адаптивнай үөрэххэ ананар».

Ону сэргэ кииҥҥэ улууска олорор оҕолору тэйиччиттэн үөрэтэр кыахтаах кылаастар баар буолуохтара. Оскуола кэлэр үөрэх дьылыттан үлэтин саҕалыа.