Горнай Аһыматыгар Аҕа дойду бэтэрээнин хартыыналарын быыстапката турда

Васнецов, Шишкин, Левитан онтон да атын нуучча улуу худуоһунньуктарын үүт-үкчү үлэлэрэ Аһыма кыраайы үөрэтэр түмэлигэр кэчигэрэһэн ыйаннылар. Горнайдар биир тумус туттар уоллара, худуоһунньук Нестор Кононов айымньыларын быыстапката аан бастакытын маннык киэҥ эйгэҕэ турда.

Татьяна Иванова, Нестор Кононов аймаҕа: "Бэйэтин дууһата хайдах этэринэн, бэйэтэ хайдах сатыырынан суруйан хаалларбыт уруһуйдара күн бгүн биһигини кэрэҕэ, сырдыкка сирдииллэр. Кини ордук нуучча худуоһунньуктарын айымньыларын үтүгүннэрэн уруһуйдуура".

Нестор Кононов 1926 сыллаахха төрөөбүтэ, ыал улахан оҕото буолан, кыратыттын үлэҕэ такаллан улааппыт. Тутатына колхуоска үлэлии киирэн, суруксутунан, суотчутунан үлэлээбит. 18 сааһын туолуута Аҕа дойду улуу сэриитигэр Японияны утары кыргыспыт. Сэрии ыар амтанын биллэр, кэрэҕэ, сырдыкка тардыыһытын ыһыктыбатах. Кини уруһуйдара күн бүгүҥҥэ диэри тиийэн оччотооҕу кэми туоһулууллар.

Татьяна Иванова, Нестор Кононов аймаҕа: "Биһиги нэһилиэкпит олохтоохторо, Павловтар диэн ыал оҕолоро. Кинилэр сэниэ ыал эбит. Ол иһин боруода аттары ылан онон сылдьаллар эбит. Ону Нестор Кононов холустатыгар түһэрбит".

Быыстапка Кировскай кыраайы үөрэтэр түмэлигэр дьон дьүүлүгэр турда. Мусуойу оччолорго бибилэтиэкэринэн үлэлии сылдьыбыт Татьяна Иванова 1995 сыллаахха тэрийэн, арыйан үлэлэппитэ. Ол кэмтэн ыла манна үгүс үлэ ыытыллан, билигин манна 10 экспозиция үлэлии турар.

Виктория Мухоплёва, Кировскай кыраайы үөрэтэр түмэлин үлэһитэ: "Биһиги түмэлбит икки тыһыынчаттан тахса экспонаттаах. Ол иһигэр СӨ Ойуулуур-дьүһүннүүр бас түмэлэ таһаарбыт “Раритеты Якутии” кинигэтигэр киирбит экспонаттар бааллар".

Оттон манна даҕатан эттэххэ, быыстапка олохтоох нэһилиэнньэ болҕомтотун тардан өссө да ый кэриҥэ турара былааннанар.