Саҥа дьыллааҕы өрөбүллэргэ кэккэ быһылааннар бэлиэтэннилэр

Сыл саҥатыгар коммунальнай авария бүтүн бөүөлэк олохтоохторун ититиитэ суох хаалларда. Эдьигээн улууһугар Эдьигээҥҥэ бэйэтигэр киин хочуолунайы өрөмүөннээһин салҕанар. Тохсунньу 7 күнүгэр 4-с хочуолу оҥорон үлэлэппиттэрэ. Бу бэлиэ ситиһии диэн Быраабыылыстыба бэрэссэдээтэлин бастакы собуйааччы Дмитрий Садовников иһитиннэрбитэ.

Бүгүҥҥү күҥҥэ 7 хочуол кэһиллиитэ суох үлэлии турар. Өссө биир хочуол оҥоһуллан бүгүн, сарсын өрөмүөннэнэн бүтүөхтэх, ону тэҥэ икки хочуол илии режимынан ититэ тураллар, кинилэри эмиэ бу күннэргэ чөлүгэр түһэрэн оҥоруохтара диэн эрэннэрдилэр, наадалаах сапчааһы барытын Дьокуускайтан тиксэрбиттэрэ.

Оттон улуус Бэстээх нэһилиэгэр ититии ситимин уокка көһөрүү барбыта, социальнай эбийиэктэри, дьиэлэри электроотоплениеҕа ситиһиилээхтик холбоон балаһыанньа этэҥҥэ. Санатан эттэххэ, Эдьигээн улууһун Бэстээҕигэр саҥа дьыл түүн нэһилиэк хочуолунайа умайбыта, оттон Эдьигээн бөһүөлэгэр тохсунньу 5 күнүгэр киин хочуолунай үлэтэ кэһиллэн бөһүөлэк тоҥор кутталламмыта. Уопсайынан коммунальнай авария тахсыыта тымныы күн-дьыл турар кэмигэр биллэ элбиир, улуустарга эрэ буолбакка, киин куоракка эмиэ кэккэ аадырыстарынан уу тоҕо, уот барыыта элбэхтик таҕыста.

Саҥа сыл бастыкы нэдиэлэтигэр Саха сирин үрдүнэн уопсайа 36 баһаар таҕыста, онтон 20-тэ олорор дьиэлэргэ. Баһаарынайдар түргэн-тарҕан көмөлөрүнэн 10 киһини уоттан быыһаатылар. Хомойуох иһин Нам улууһугар чааһынай дьиэ умайбытын түмүгэр 2 киһи суорума суолланна. Хаҥалас улууһун Төхтүрүгэр сынньанар база тутуута уокка былдьанна. Уот турар сүрүн төрүөтүнэн уоту кытта сэрэҕэ суох буолуу, итиэннэ ититэр прибордары туттууга куттала суох буолуу ирдэбиллэри тутуспаттара буолар. Уһун өрөбүллэргэ өрөспүүбүлүкэ тустаах тэрилтэлэрэ бары үлэлэрин күүһүрдэн үлэлээтилэр. Баһаарынай кэтэбил исписэлиистэрэ рейдэлэри, бэрэбиэркэлиир үлэлэри тэрийэн ыыттылар.

Томороон тымныыларга, тумаҥҥа суолга-иискэ бэрт сэрэхтээх буолуу ирдэнэр. Аҥардас Дьокуускайга сыл саҕаланыаҕыттан  уопсайа 43 быһылаан тахсыбыт, ол онтон 3 аварияҕа 4 киһи, ол иһигэр кыра оҕо эчэйии ылла.

Ол курдук Намныыр суол 14 км уонна Ойуунускай уулуссатыгар  хастыы даҕаны массыына кыттыылаах суол быһылааннара тахсан дьон эчэйдилэр. Арыгы иһиилээх суоппардартан сылтаан хас даҕаны суол аварията эмиэ буолла. Маныаха тохсунньу 1 күнүттэн суол бырабылатын кэһиитигэр уларыйыылар киирдилэр, ол курдук чуолаан ыстаарааптар кээмэйдэрэ эбилиннэ. Холобура, итирик ыытааччы тутуллар түгэнигэр эрдэ ыстараап 30 тыһыынча эбит буоллаҕына, мантан инньэ 45 тыһыынча тэҥнэстэ. Итиэннэ балтараа сылтан икки сылга диэри ыытар быраабын былдьатыан сөп.

Бэйдиэ сылдьар ыт кыһалҕата кыайтарбат. Дьокуускайга Сайсары оройуонугар уулуссаҕа оҕону ыт ытырбыта бэлиэтэннэ. Маныаха бу ыты туппуттарын түмүгэр хаһаайыннаах диэн быһаарбыттара. Сыл саҥатыттан киин куоракка 32 дьэллик ыты тутан тустаах кииҥҥэ ыыттылар. Бу хайысхаҕа үлэ тиһиги быспат.