Саха сиригэр тэҥинэн тоҕус социальный эбийиэги арыйдылар

Саха сиригэр кэнники сылларга нэһилиэнньэ, дьон-сэргэ олоҕун тупсарар саҥа эбийиэктэр тэтимнээхтик тутуллан үлэҕэ киирэ тураллар. Саҥа сылы көрсө Ил Дархан Айсен Николаев үөрүүлээх быһыыга-майгыга Өрөспүүбүлүкэ хас да улууһугар тэҥинэн тоҕус социальнай эбийиэги арыйда.

Ол курдук култуура, үөрэҕэрии, успуорт, доруобуйа эйгэтигэр саҥа эбийиэктэр, араас бырагырааманан тутуллан киирдилэр. Үөһээ Бүлүү улууһугар култуура киинэ уонна оскуола, Сунтаар улууһугар  балыыһа уонна култуура-спорт киинэ, Алданна оҕо ускуустубатын дьиэтэ, Ньурбаҕа оскуола, Уус Алдан улууһугар дьиэ кэргэн элбэх хайысхалаах киинэ уонна Амма улууһугар култуура киинэ.

Онтон биирдэстэрэ Амма улууһун Соморсун нэһилиэгэр тыа сиригэр олох хаачыстыбатын тупсарыыга анаммыт бырагыраама чэрчитинэн  тутуллан киирбит саҥа норуот айымньытын дьиэтэ буолар. Эбийиэк 1,5 сыл тутуллан олоххо киирдэ.

Алексей Кононов, Соморсун нэһилиэгин баһылыга: «Бырайыакпыт куонкуруһу ааспыта уонна 2022 сыллаахха тутуута саҕаламмыта. Уонна бэдэрээтчит кэмигэр үчүгэй баҕайы эбийиэги киллэрдэ».

Саха норуодунай суруйааччы Баһылай Харысхал аатын сүгэр саҥа култуура дьиэтэ 1000 кв.м. иэннээх, 150 миэстэлээх көрөр саалалаах, киэҥ-куоҥ, элбэх сырдык хостордоох, миэбэлинэн, уотунан-күөһүнэн толору хааччыллыбыт.

Надежда Игнатьева, Баһылай Харысхал аатынан норуот айымньытын дьиэтин дириэктэрэ: «Биһиги нэһилиэкпитигэр Саҥа дьыл буолаары турдаҕына сүрдээх үчүгэй бэлэх буолла. Үөрүүбүт муҥура суох».

Маннык саҥа эбийиэктэр туттуллан олоххо киирэллэрэ, нэһилиэк олоҕо сайдарыгар, ыччат дьон тыа сиригэр үлэлииригэр-олохсуйарыгар төһүү күүс буолар.