"Аҕа дойдуну көмүскээччилэр" судаарыстыбаннай пуонда филиала үлэтин түмүгүн таһаарда

Хаҥалас улууһун Тиит-Арыытын олохтооҕо, анал байыаннай дьайыыга Ийэ дойдутун көмүскэлигэр сырдык тыынын олук уурбут Иван Бараксин ийэтэ Лариса Петрова бүгүн "Эр санаа" уордьаны илиитигэр тутта.

Кини оҕотун сырдык кэриэһин үйэтитэр уордьаны ылан, ийэ киһи арыый эмэ уоскуйдаҕа. Маныаха улахан өйөбүлү "Аҕа дойдуну көмүскээччилэр" судаарыстыбыннай пуондаттан ыллым диэн Лариса Петрова санаатын бу күн уллэһиннэ.

Лариса Петрова, Хаҥалас улууһун олохтооҕо: «Мин манна бастакыбын кэлбиппэр долгуйбутум. Манна улахан психологическай уонна моральнай өйөбүлү уонна болҕомтону уурбуттара».

Арассыыйа "Аҕа дойдуну көмүскээччилэр" судаарыстыбаннай пуонда Саха сиринээҕи салаата сыллааҕы үлэтин түмүгүн торумнаата. Бу күн анал байыаннай дьайыыга сылдьар байыастарбыт аҕаларыгар анал мэтээли уонна хомойуох иһин сырдык тыыннарын толук уурбут байыастарбыт дьонноругар уордьаннары туттардылар.

Күн бүгүн бу тэрээһиҥҥэ уопсайа 10-ча байыас дьонноро уордьаннары илиилэригэр туттулар. Манна даҕатан эттэххэ, маннык ыарахан кэмҥэ тустаах пуонда өйөбүлэ улахан төһүү буолбут. Ол курдук, сыл саҕаланыаҕыттан 32000 араас хабааннаах ыйытыыттан, араас өйдөспөт буолуу түгэннэрин уопсайа 29000 боппуруоһу пуонда быһаарбыт.

Алексей Александров, РФ "Аҕа дойдуну көмүскээччилэр" судаарыстыбаннай пуонда Саха сиринээҕи салаатын салайааччыта: «Уопсайа 3150 тахса киһини арыаллаан олоробут билигин. 44 социальнай координатор. Уопсайа биһи үлэлээбиппит 1,5 сыл буолла. Ол тухары 8,5 тыһ. тахса киһи кэлэн бэйэтин боппуруостарынан косультация ылла. Быһаарыллыбатах боппуруостарын олохтоох былаастары кытта быһааран турабыт».

Маныаха бу күн анал байыаннай дьайыыга сылдьар байыастарбыт аҕаларыгар эмиэ мэтээл туттардылар. Биир бастакынан Амматтан төрүттээх Николай Уваров аҕата Василий Уваров ылар чиэскэ тигистэ.

Василий Уваров, Амма улууһун олохтооҕо: «Биһиги ааммытыгар өстөөхтөр тоҥсуйа тураллар. Биһиги интэн туора туруо суохтаахпыт диэн баран срочнай сулууспаҕа баран номнуо хантараак баттаһан СВОҕа барбыта».

Оттон тустаах пуонда сыллааҕы үлэтин түмүгүн таһааран, салгыы кэлэр сылга үлэтин былаанныаҕа.