Дьокуускайдааҕы национальнай гимназияҕа Саҥа дьыллааҕы тэрээһин ааста

Чиряевтар ааттарынан Дьокуускайдааҕы национальнай гимназия 1в кылааһа долгуйа Саҥа дьыллааҕы утренниктарын күүтэр. Кырачааннар бу күһүн аан бастакытын оскуола боруогун атыллаан билии киэҥ аартыгар үктэммиттэрэ. Оҕолор бастакы учууталлара, кылаас салаайааччыта Мария Егоровна Габышева хас биирдиилэригэр болҕомто ууран иитэр-үөрэтэр.

Мария Габышева, Дьокуускайдааҕы национальнай гимназия 1"в" кылааһын салайааччы: «Номнуо доҕордоһоннор, элбэҕи билэннэр ааҕар-суоттуур буоллулар. Ситиһиилэрин киэн туттаннар бүгүн Саҥа дьылы көрсөөрү сылдьаллар».

Саҥа дьылы көрсөр күүтүүлээх тэрээһиҥҥэ алын сүһүөх үөрэнээччилэрэ бөлөххө арахсан кытыннылар. Бу 1 уонна 4 кылаас оҕолоро бырааһынньыктааҕы нүөмэрдэрэ. Хас биирдии кылаас ыллаан-үҥкүүлээн бэртээхэй көстүүнү бэлэмнээбит.

Кыраларыттан бу оскуолаҕа төрөөбүт тылы үөрэтиигэ, төрүт үгэстэри билиигэ улахан болҕомто уураллар. Дойду үрдүнэн икки сыллааҕыта "Орлята России" диэн бырайыак олоххо киирбитэ. Кырачаан гимназистар ол хамсааһын кэккэтигэр киирсибиттэрэ. Оттон быйыл алын кылаас учууталлара бу бырайыагы саха оҕотугар чугас гына тылбаастаан "Өксөкү сиэннэрэ" диэн улуу киһибит аатыгар, кини халларбыт нэһилиэстибэтигэр сүгүрүйэн бэлэмнээтилэр.

Вероника Васильева, Дьокуускайдааҕы национальнай гимназия дириэктэрин сүбэһитэ: «Бу федеральнай бырагыраама тугун да уларыппакка олохтоох матырыйаалы киллэрэн оҥорон биэрдибит».

Алын кылаастар араас таһымнаах тэрээһиннэргэ, күрэхтэһиилэргэ көхтөөхтүк кытталлар. Үүнэр сылга Улуу Кыайыы 80 сыллаах үбүлүөйүн бэлиэтиэхпит, ону тэҥэ Сахабыт сиригэр Ийэ дойдуну көмүскээччи сыла биллэриллэн чуолаан патриотическай иитиигэ киин болҕомтону ууруохтара.

Анатолий Чиряев, Дьокуускайдааҕы национальнай гимназия дириэктэрин иитэр үлэҕэ солбуйааччы: «Оҕолор хамсааһыннарын кытта күүскэ үлэлэһэбит. Биһиэхэ бэйэбитигэр “Үрдэл” диэн оҕо хамсааһына баар».

Саҥа дьыллааҕы тэрээһиҥҥэ оҕолор бэлэмнээбит кэнсиэрдэрин тэҥэ, квест оонньуу, Чысхаан, Хаарчаана эҕэрдэлэрэ, уопсай хоровод буолла. 4г кылааһын үөрэнээччилэригэр быйыл эппиэтинэстээх алын сүһүөҕү бүтэрэр сыллара, онон үөрэхтэригэр кыһаллыы ирдэнэр. 

Вера Захарова, Дьокуускайдааҕы национальнай гимназия 4 "г" кылааһын салайааччы: «4 кылааска болҕомтону уурабыт. Экзаменнарга бэлэмнэнии саҕаланыа».

Гимназияҕа алын сүһүөххэ 450-тан тахса оҕо үөрэнэр. Бары Тымныы оҕонньор бэлэҕин тутан астынан, дуоһуйан тарҕастылар. Бастакы кылаастарга быйыл Дьокуускай салалтатын аатыттан эбии минньигэс бэлэх туттарыллан кырачааннар үөрүүлэрэ өссө үксээтэ.