Тыа сиригэр оҕо спордун сайыннарыы

Кэбээйи орто оскуолатын 6 кылааһын үөрэнээччитэ Ваня Сыроватский күннэтэ саалаҕа үөрэ-көтө кэлэр. Тренер ыйыытын-кэрдиитин барытын болҕомтолоохтук истэн, номнуо спортивнай оскуола иитиллээччилэрин иһигэр инникилэр эрээттэригэр сылдьар.

Иван Сыроватский, Кэбээйитээҕи оҕо спортивнай оскуолатын иитиллээччитэ: «Үчүгэйдик дьарыктыыр. Бэйэм буоксаны ынырык сөбүлүүбүн. Буоксанан оҕолор дьарыктаналларыгар баҕарабын».

2015 сыллаахха Кэбээйигэ оҕо спортивнай оскуолата аанын тэлэччи аспыта. 3 сылынан бу спорт кыһата Өрөспүүбүлүкэтээҕи оҕо спорт оскуолаларын иһинэн үлэлээн саҕалаабыта. Билигин манна тустууга, мас тардыһыыга, хапсаҕайга, көҥүл тустууга, элбэх хамсаныылаах спорт көрүҥнэрэ уонна буоксаҕа дьарыктар ааһаллар. Холобура, буоксаҕа оҕолор үгүс ситиһиилээхтэр.

Николай Находкин, Кэбээйитээҕи оҕо спортивнай оскуолатын  буоксаҕа тренерэ: «Бу алта сыл иһигэр кыра ситиһиилэр бааллар. Олимпийскай резерватын училищетын кытта ыкса үлэлиибит. Билиҥҥи кэмҥэ икки оҕобут онно үөрэнэр. Кинилэр спорт маастарыгар кандидат нуоруматын толорбуттара. Уонна Мэҥэ Хаҥалас Майатын спорт оскуолтаны кытта үлэлиибит. Онно үс оҕобут үөрэнэ сылдьар. Өрөспүүбүлүкэ первенствотын призердара уонна чемпионнара. Сотору кэминэн Хабаровскай мэрын кубогар барыахтаахтар. Саҥа дьыл кэннэ Кабардино-Балкарияҕа барыахтаахтар».

Биллэн туран манна биир бас-көс миэстэни көҥүл тустуу ылар. Бу спорт көрүҥэр дьарыктары Өрөспүүбүлүкэҕэ биллэр тустуук, Кэбээйилэр тумус туттар уоллара Эдгар Кулачиков салайан ыытар.

Эдгар Кулачиков, Кэбээйитээҕи оҕо спортивнай оскуолатын  көҥүл тустууга тренерэ: «Спортка барытыгар уоттаах харахтаах, талааннах оҕолор бааллар. Олору бэйэбит туспа көрөн чочуйан дьарыктыыбыт. Өрөспүүбүлүкэҕэ кыра-кыралаан ситиһии көрдөрөллөр. Бу соторутааҕыта Владивосток куоракка биһи иитиллээччибит Федотов Федя үһүс миэстэ буолбута».

Чахчы, хас биирдии оҕоҕо туспа болҕомто ууруллан, ол да төрүөтүнэн буолуо тустаах оскуола иитиллээччилэрэ спортка үрдүк көрдөрүүлээхтэр. Маныаха филиаллар эмиэ хаалсыбаттар.

Анаппыт Бэргэн Боотур, Кэбээйитээҕи оҕо спортивнай оскуолатын салайааччыта: «Биир филиалбыт Тыайаҕа баар уонна үс филиал Чагда нэһилиэгэр баар. Икки филиалбыт Мастаах нэһилиэгэр баар. Онно аатырбыт многоборецтарбыт бааллар».

Дэриэбинэ спорт саалаларыттан - улахан спортка. Бу курдук салайтарыылаах тустаах оскуола чаҕылхай спортсменнары чочуйан таһаарар.