Ил Дархан кэлэр сылы Ийэ дойдуну көмүскээччи сылынан биллэрдэ

Өрөспүүбүлүкэ саалата. Ил Дархан Айсен Николаев сэттис анал туһаайыыта. Аспыт сыл дьоһуннаах түмүктэрин, кэлэр сыл кэскиллээх былааннарын хас биирдии саалаҕа олорооччу болҕойон иһиттэ. Ханнык да хайысханы туора көппөтө. Биллэн турар дьиэ кэргэн өйөбүлэ инники күөннэ.

Степан Саргыдаев, Чурапчы улууһун баһылыга: «Дьиэ кэрэгэҥҥэ элбэх болҕомто уурулунна. Өрөспүүбүлүкэтээҕи ийэ хапытаала улаатыытын туһунан эттэ. Бу хайысхаҕа улуустар бары бииргэ үлэлиибит».

Кэлэр сылга 13 саҥа оскуола, манна эбии уһуйааннар үлэҕэ киириэхтэрэ. Төрүт ийэ тылга болҕомтону ууруу өссө күүһүрүөхтээх. Оскуола оҕолоругар дойдуга бэриниилээх буолууга туһуланар үлэ хайаан да салҕаныахтаах диэн Айсен Сергеевич тоһоҕолоон эттэ.

Евгений Григорьев, Дьокуускай куорат баһылыга: «Дьокуускай куоракка оскуолалары тутааһыҥҥа өйөбүлүн этэрин биһи сүрдээҕин үөрэбит. Уонна маастар-былааҥҥа көрүллүбүт эбийиэктэрбит тутуллуохтара диэн эрэнэбит».

Ил Дархан кэлэр сылга тыа хаһаайыстыбатын салаатын сайдыытыгар чопчу этиилэри оҥордо. Ону саала,  сэргии иһиттэ уонна сөптөөҕүнэн аахта.

Артём Александров, СӨ тыа хаһаайыстыбатын миниистэрэ: «Боломуочуйаны кэҥэтии бу сокуону уларытыыларбытыгар эмиэ бэлиэтээбит бу сүрүн улахан суолталаах диэн этиэххэ наада. Тыа сирин оройуоннарыгар бэйэлэригэр кыах бэрилиннэ».

Арктика уонна Хоту улуустарыгар болҕомто. Өссө күүһүрүөн наада диэтэ. Биир сүрүн пуунунан бу улуустарга атыы-эргиэн логистическай кииннэр ситимнэрин толору үлэлэтэргэ соруйда. Маны сэргэ туһаайыыга ыҥырыллан кэлбит Арктика улуустарын баһылыктара билиэт төлөбүрүгэр чэпчэтиини салҕыыры үөрэ иһиттилэр.

Эдуард Платонов, Анаабыр улууһун баһылыга: «Көтөр билиэттэри субсидиялыыры салҕыахха диэн эттэ. Уонна Арктика министиэристибэтин үлэтин күүһүрдэн биэриэххэ диэн бэлиэтээтэ».

Саха сиригэр уһун үйэлэнии көрдөрүүтэ үрдээбит. Маныаха Өрөспүүбүлүкэҕэ медицинэ эйгэтэ сайдан иһэр, сылын аайы саҥа эбийиэктэр тутуллан үлэҕэ киирэллэр. Өрөспүүбүлүкэ да, бэдэрээлинэй да хааһынаттан бу салааны сайыннарарга олус элбэх үлэ ыытыллара туһаайыга эмиэ бэлиэтэннэ.

Степан Кузьмин, Амма улууһун баһылыга: «Күүтүүлээх поликлиникабытын 2025 сылга болдьоҕун уһапакка олоххо киириэхтээх диэн биһигитини үөртэ. Бары болҕойон иһиттибит, хас биирдии оскуолаҕа уонна уһуйааҥҥа медицинэ үлэһиттэрин төптөрү төнүннэрэргэ диэни».

Туһаайыы тутаах чааһа. Ил Дархан Айсен Николаев 2025 сылы биллэрэр.

Саха сиригэр Ийэ дойдуну көмүскээччи сыла биллэриллибитэ мээнэҕэ буолбатах. Эһиил Улуу Кыайыы 80 сыла. Онон патриотическэй санааны өрө тутууга, сайыннарыыга саамай тоҕоостоох кэм.

Игорь Юргин, Россия Дьоруойа: «Этот год принесет сплочения, выявит боевой численный состав. Это правильно».

Анал байыаннай дьайыы кыттылаахтарыгар, кинилэр дьиэ кэргэттэригэр Өрөспүүбүлүкэ өтүттэн өйөбүл тиһигин быспат. Ол үлэ кэлэр да сылларга салҕанар, өссө күүһүрэр чинчилээх. Маны Ил Дархан сорудухтара, саҥа хамсааһыннара туоһулууллар.

Назар Петров, анал байыаннай дьайыы кыттыылааҕа: «Бары дойду көмүскээччилэригэр 2025 сылга үрдүк дуоһунастарга тиксиэхтэрэ диэн эрэнэбин. Уонна үлэлээх буолуохтара бары. Ити олус үчүгэй биэрдэ».

Ааспыт сылга эмиэ бу саалаҕа биллэриллибит оҕо сыла регионна түмүктэннэ. Сыалын-соругун ситтэ. Ол эрэн бу салааны салгыы да болҕомто киинигэр тутар наада диэн Ил Дархан бэлиэтээтэ.

Вильям Иванов, СӨ бэтэрээннэрин сэбиэтин бэрэссэдээтэлэ, СӨ үтүөлээх юриһа: «Ханнык хайысханан тугу эмит ситистибит ду суох ду. Ситиспит буоллахпытына туоҕа тиийбэтий диэн быһаара сатаата. Уонна барытын чуолкайдык быһаарда. Барытын истэн, түмүктээн бэйэбит үлэбитигэр киллэрэн үлэлиэхпит».

Сэттис тууһаайыы 1,5 чаас кэриҥэ барда. Бу тухары ыҥырыылаах ыалдьыттар Өрөспүүбүлүкэ аҕа баһылыгын этиилэрин, түмүктэрин, былааннарын салҕыбакка иһиттилэр. Ол аата эрэгийиэн бүгүҥҥү күннээҕи социальнай-экономическэй сайдыытын тосхоло сөптөөҕүн туоһута буолар.